فیصل آباد (این این آئی) سعودی عرب کے وزیر حج وعمرہ صالح بن طاہر بنتن نے کہا ہے کہ خادم الحرمین الشریفین شاہ سلمان بن عبدالعزیز آل سعود کے حکم پر عمرہ ویزا فیس پر نظر ثانی کی جارہی ہے لہٰذا عمرہ زائرین جلد خوشخبری سنیں گے۔ان خیالات کا اظہار انہوں نے ایسوسی ایشن آف ایشین حجاج کے کنونیئرحافظ شفیق کاشف کیساتھ ٹیلی فون پر گفتگو کرتے ہوئے کیا۔ انہوں نے کہا کہ سعودی حکومت نے ہمیشہ اپنے وسائل سے ہی حج و عمرہ کی سعادت کیلئے آنے والے زائرین کی خدمات انجام دی ہیں۔ تاہم اتنی بڑی تعداد کو قیام و طعام، صحت و صفائی اور نقل وحرکت کی سہولتیں مہیا کرنا نجی شعبے کے تعاون کے بغیر ممکن نہیں ہے جس کیلئے نجی شعبہ مناسب مقدار میں سروس چارجز لینے کا مجاز ہے لیکن پرائیویٹ سیکٹر کو من مرضی کی فیس وصول نہیں کرنے دیں گے، حکومت اور نجی شعبے کا مقصد عازمین حج وعمرہ کی خدمت کرنا ہے لہٰذاعمرہ زائرین پر نافذ کی گئی ویزا فیسوں پر اگلے دو تین روز میں فیصلہ کیا جائے گا، حافظ شفیق نے کہا کہ سعودی حکومت کی طرف سے لاکھوں کی تعداد میں حج و عمرہ ویزا کی بلا معاوضہ فراہمی کی وجہ سے امتِ مسلمہ ہمیشہ سعودی قیادت کی ممنونِ احسان رہی ہے لہٰذا نامساعد اقتصادی حالات کے باوجود وقت کا تقاضہ ہے کہ سعودی قیادت عمرہ و حج ویزوں کی فیس واپس لے تاکہ سعودی عرب کے ناقدین و حاسدین اس پر سیاست نہ کر سکیں۔انہوں نے کہا کہ پاکستانی زائرین سب سے زیادہ متاثر ہورہے ہیں کیونکہ اب تک بھی پوری دنیا میں سعودی سفارتخانوں سے جاری ہونے والے عمرہ ویزوں میں پاکستان 50ہزار ویزے حاصل کرکے پہلے نمبر پر ہے۔
آج کی سب سے زیادہ پڑھی جانے والی خبریں
