روم(این ان آئی)اٹلی کے مرکزی علاقوں میں بدھ کی رات دو بار زلزلہ آیا جس کے نتیجے میں کئی عمارتوں کو نقصان پہنچا جبکہ متاثرہ علاقوں میں لوگ زلزلے کے جھٹکوں سے خوف زدہ ہو کر گھروں سے باہر نکل آئے جبکہ دس افرادزخمی بھی ہوئے جن میں سے چارکو شدید چوٹیں آئیں،بعض علاقوں میں زلزلے کے بعد سے بجلی نہیں ہے جبکہ بعض تاریخی عمارتوں کو بھی نقصان پہنچنے کی اطلاعات ہیں۔ روم میں زلزلے کے بعد سے بعض جگہوں پر تودے کھسکنے کے بھی واقعات پیش آئے ۔غیرملکی خبررساں ادارے کے مطابق حکام نے بتایا کہ 5.5 کی شدت کے پہلے زلزلے کا جھٹکا مقامی وقت کے مطابق رات نو بج کر دس منٹ پر صوبہ میسراتا میں ویسو کے پاس محسوس کیا گیا۔اس کے تقریباً دو گھنٹے بعد اسی علاقے میں 6.1 کی شدت کا دوسرا زلزلہ آیا۔ ان واقعات میں کئی افراد کے زخمی ہونے کی اطلاعات ہیں لیکن فوری طور پر کسی کی ہلاکت کی کوئی خبر نہیں ۔عوام کے تحفظ سے متعلق محکمے کے ایک افسر فبریزیو کیروچو نے بتایا کہ تقریباً دس افراد زخمی ہوئے جس میں سے چار کو شدید چوٹیں آئی ہیں۔زلزلے کے یہ جھٹکے اٹلی کے دارالحکومت روم سمیت تقریباً سبھی مرکزی علاقوں میں محسوس کیے گئے۔ روم میں زلزلے سے عمارتیں ہل گئیں اور کھڑکیاں کھڑ کھڑانے لگیں۔ایک عینی شاہد نے اطالوی ٹی وی کو بتایا کہ انھوں نے اپنے سامنے ایک عمارت کے بعض حصوں کو گرتے ہوئے دیکھا۔بعض علاقوں میں زلزلے کے بعد سے بجلی نہیں ہے جبکہ بعض تاریخی عمارتوں کو بھی نقصان پہنچنے کی اطلاعات ہیں۔ روم میں زلزلے کے بعد سے بعض جگہوں پر تودے کھسکنے کے بھی واقعات پیش آئے ۔اوسستا شہر کے میئر مارکو رندالی نے دوسرے زلزلے کے بارے میں بات کرتے ہوئے اطالوی نیوز ایجنسی کو بتایا کہ یہ بہت زور دار اور تباہ کن زلزلہ تھا، لوگ باہر گلیوں میں چیخ رہے ہیں اور اب ہم بغیر روشنی کے ہیں۔متاثرہ علاقوں میں جمعرات کو سکول کالجز بند رکھنے کا اعلان کیا گیا۔ مقامی میڈیا کے مطابق ملک کے وزیر اعظم روم کے دورے پر روانہ ہوچکے ہیں۔

موضوعات:اٹلی زلزلہ