اسلام آباد(مانیٹرنگ ڈیسک)چین کے ساتھ متنازع سرحد پر بھارت نے 100 ٹینک لگا دیئے، باہمی تعلقات متاثر ہونے کے ساتھ ساتھ بھارت میں چینی سرمایہ کاری بھی متاثر ہونے کا خطرہ پیدا ہو گیا۔غیرملکی اخبار نے اپنی ایک تجزیاتی رپورٹ میں کہا کہ بھارتی فوج نے اپنے100 ٹینک لداخ میں متنازع چینی سرحد پر لگا تو دیئے ہیں مگر اس سے بھارت میں بڑھتی ہوئی چینی کمپنیوں کی سرمایا کاری متاثر ہو گی۔رپورٹ میں کہا گیا ہے کہ دونوں ملکوں کو جلد از جلد غلط فہمیاں دور کرنا ہوں گی کیونکہ ٹینکوں کی تعیناتی کی اطلاعات سے دونوں ملکوں کے تعلقات کے ساتھ ساتھ بھارت میں سرمایہ کاری میں دلچسپی رکھنے والی چینی کمپنیوں کی بے اعتمادی میں اضافہ ہو رہا ہے۔
میڈیا رپورٹس کے مطابق بھارتی ٹینکوں تعیناتی کا مقصد کسی ممکنہ دھمکی سے بچنا تھا تاہم اس کا زیادہ اثر ان چینی سرمایہ کارکمپنیوں پر ہو رہا ہے جو بھارت میں اپنی سرمایہ کاری بڑھانے پر غور کر رہے ہیں۔ماہرین حیران ہیں ایک طرف بھارت چین کے ساتھ سرحد پر ٹینک تعینات کر رہا ہے اور دوسری چینی سرمایہ کاری میں اضافے کے لئے بھی سخت کوششیں کر رہا ہے۔دوسری طرف چین نے بھی میدان میں کودنے کا فیصلہ کر لیا ہے۔ ذرائع کے مطابق بھارت کی طرف سے جارحانہ رویے کے بعد چین نے بھی اپنی فوج کو ریڈالرٹ کر دیا ہے۔