اسلام آباد(مانیٹرنگ ڈیسک) بھارتی میڈیا نے ایک بار پھر پاکستان کیخلاف شدید زہر اگلناشروع کر دیا ۔بھارتی ٹی وی ’’انڈیا ٹوڈے‘‘ نے اپنی ایک رپورٹ میں کہا کہ نواز شریف نے امیریکی صدر باراک اوباما سے جو ملاقات کی تھی اس میں وہ امریکہ سے بھارت کیخلاف پاکستانی ایجنڈا لاگو کروانا چاہتے تھے۔ ’’انڈیا ٹوڈے‘‘ نے کہا کہ وزیر اعظم نواز شریف امریکی صدر باراک اوباما کو شکایتیں لگاتے رہے جبکہ امریکی صدر نے ان کی کسی ایک بات پر کان نہیں دھرے، الٹا اوبامہ نے پاکستان کو الٹی میٹم دیدیا۔
بھارتی ٹی وی رپورٹ میں پاکستان کیخلاف شدید ہرزہ سرائی کی گئی اور رپورٹ میں دکھایا جاتا رہا کہ پاکستان اپنے اندر سینکڑوں ’’دہشت گرد‘‘ تنظیموں کو پروان چڑھا رہا ہے اور ان تنظیموں سے بھارت میں دہشت گردی کروانا چاہتا ہے۔ بھارتی ٹی وی نے الزام لگایا کہ حافظ سعید براہ راست بھارت میں دہشتگردانہ کارروائیوں میں ملوث ہیں اور انہیں پاکستانی فوج اور آئی ایس آئی کی سرپرستی حاصل ہے جبکہ امریکہ نے حافظ سعید کے سر کی قیمت 65 کروڑ روپے رکھی ہے۔ انڈیا ٹوڈے نے کہا کہ ماضی میں بھی حافظ سعید کے خلاف کارروائی کا مطالبہ کیا جاتا رہا ہے لیکن اس بار پاکستان نے امریکہ کے آگے حتمی طور پر سر جھکا دیا ہے۔