مکہ مکرمہ (این این آئی)رمضان المبارک کے دوران عمرہ کی ادائیگی کے لئے آنے والوں کی سلامتی اور تحفظ یقینی بنانے اور امن وامان کی صورت حال پر نظر رکھنے کے لئے جدید ترین مواصلاتی آلات او رکیمروں سے لیس طیار ے اور ہیلی کاپٹربھی استعمال کئے جا رہے ہیں۔ سعودی عرب کی جنرل ایوایشن اتھارٹی کے سربراہ میجر جنرل محمد بن عید الحربی نے بتایا کہ یہ طیارے مسجد الحرام کے گرد و نواح ‘ مکہ مکرمکہ سے جدہ اور مدینہ منورہ جانے والی سڑکوں اور رش والے مقامات کی فضائی نگرانی کر تے ہیں اور کیمروں سے حاصل کردہ تصاویر کنٹرول رومز اور سیکیورٹی اداروں کو ارسال کرتے ہیں جن کی روشنی میں انتظامیہ معتمرین کی نقل و حرکت کے حوالے سے درپیش مشکلات دور کرنے کے لئے ضروری اقدامات کرتی ہے ۔ طیاروں کو ہنگامی حالت سے نمٹنے کے لئے شاہ عبدالعزیز میڈیکل سٹی، النور اسپتال اور الحراء اسپتالوں کے ہنگامی رن ویز پرالرٹ رکھا گیاہے تاکہ کسی بھی حادثے کی صورت میں فوری طبی اور امدادی کارروائی شروع کی جاسکے۔دریں اثناء ہجوم کے باعث حادثات سے بچنے کے لئے مسجد الحرام کے داخلی دروازوں ،چھت اور اس کی جانب آنے والے راستوں پر نصب شدہ ساڑھے سات سو سے زیادہ کیمروں کی مدد سے بھی زائرین کی تمام نقل وحرکت کی نگرانی کی جاتی ہے۔یہ تمام کیمرے کمپیوٹر ائزڈ سسٹم کے تحت سکرینوں سے منسلک ہیں اور سیکورٹی اہلکار ان کی مسلسل مانیٹرنگ کرتے ہیں ۔مسجد الحرام کے لیے سکیورٹی پلان کے تحت لوگوں کا کسی ایک جگہ ہجوم ہونے سے روکا جاتا ہے،انھیں خالی جگہوں کی جانب جانے کی ہدایت کی جاتی ہے اور نمازوں کے بعد مختلف دروازوں سے ان کے بہ طریق احسن گزر کو یقینی بنایا جاتا ہے۔اس کے علاوہ ممکنہ چوروں اور بھکاریوں کی نقل وحرکت پر بھی نظر رکھی جاتی ہے اور موٹرسائیکل اور بائیسکل سواروں کو مسجد الحرام کے نزدیکی علاقے میں داخل ہونے سے روکا جاتا ہے۔