ریاض – سعودی عرب میں 1000 کروڑوں کی سزا پانے والے مصنف کی جان بخشی کیلئے اب برطانوی شاہی خاندان کے شہزادہ چارلس بھی میدان میں آگئے ہیں اور مغربی میڈیا کے مطابق انہوں نے سعودی فرمانروا سے مصنف کی سزا پر نظر ثانی کے متعلق بات کی ہے۔ اخبار ”میل آن لائن“ کے مطابق شہزادہ چارلس نے سفارتی انداز اختیار کرتے ہوئے سعودی فرمانروا شاہ سلمان کو مصنف رائف بداوی کی سزا کے خلاف عالمی اضطراب اور اشتعال سے آگاہ کیا ہے۔ رائف بداوی کو 2012ءمیں مذہبی اور سماجی موضوعات پر مبینہ طور پر متنازع تحریریں شائع کرنے کے جرم میں گرفتار کیا گیا تھا اور انہیں 1000 کوڑے قسط وار لگانے کی سزا دی گئی تھی جن میں سے ابھی صرف پہلی قسط کے 50 کوڑے لگائے گئے ہیں۔ شہزادہ چارلس کی چھ روزہ خلیجی دورے پر روانگی سے قبل ہی انسانی حقوق کی تنظیم ایمنسٹی انٹرنیشنل نے ان پر سعودی عرب میں انسانی حقوق کے مسئلے پر بات کرنے کیلئے زور دیا تھا۔ برطانوی سفیر سائمن کولس کا کہنا ہے کہ دونوں رہنماﺅں کے درمیان دوستانہ ماحول میں مثبت گفتگو ہوئی اور انہوں نے اس امید کا اظہار کیا ہے کہ شہزادہ چارلس کی سعودی فرمانروا سے ملاقات کے نہایت اچھے نتائج سامنے آئیں گے۔