کراچی۔۔۔پاکستان کے صوبہ سندھ کے شہر کراچی کو بجلی فراہم کرنے والی کمپنی کراچی الیکٹرک کا کہنا ہے کہ500 کے وی کی ٹرانسمشن لائن ٹرپ ہونے کے باعث کراچی کے 80 فیصد حصے کو بجلی کی فراہمی بند ہو گئی ہے۔کے الیکٹرک کے مطابق بجلی کی فراہمی منقطع ہونے کے باعث متعدد ہسپتالوں کو بھی بجلی کی فراہمی متاثر ہوئی ہے۔ہفتہ اور اتوار کی درمیانی رات نیشنل گرڈ سٹیشن سے بجلی کی فراہمی اچانک معطل ہونے سے ناظم آباد، لانڈھی، کورنگی، نیو کراچی، کلفٹن، ڈیفنس، نرسری، پی سی ایچ ایس اور گلشن اقبال سمیت کئی علاقوں میں بجلی کی فراہمی رک گئی۔کے الیکٹرک ترجمان کے مطابق بریک ڈاؤن کی وجہ ہائی وولٹیج ٹرانسمشن لائن میں فنی خرابی ہے۔ انہوں نے بتایا کہ دھند اور نمی کی وجہ سے 500 کے وی کی ٹرانسمشن لائن ٹرپ کر گئی۔کمپنی کا کہنا ہے کہ نقص دور کرنے کے لیے اقدامات کیے جا رہے ہیں لیکن بجلی کی مکمل بحالی میں تین سے چار گھنٹے لگ سکتے ہیں۔گورنر سندھ ڈاکٹر عشرت العباد خان نے بریک ڈاؤن کا نوٹس لیتے ہوئے کے الیکٹرک حکام کو جلد از جلد بجلی بحال کرنے کی ہدایت کی۔یاد رہے کہ جولائی میں بھی صوبہ سندھ کے شہر کراچی سمیت کئی شہروں میں جامشورو ٹرانسمشن لائن ٹرپ ہونے کی وجہ سے بجلی کی فراہمی معطل ہو گئی تھی۔شہر کو بجلی فراہم کرنے والے ادارے ’کے الیکٹرک‘ کے ترجمان کا کہنا تھا کہ جامشورو ٹرانسمشن لائن سے 650 میگاواٹ کی فراہمی معطل ہوگئی تھی جہاں سے لائن ٹوٹنے کی وجہ سے پورا بوجھ کے الیکٹرک کے پیداواری یونٹس پر پڑ گیا ہے۔اس صورتحال کی وجہ سے شہر کے 1330 فیڈر ٹرپ کر گئے اور شہر میں بجلی کی فراہمی معطل ہوگئی تھی۔