کراچی: پاکستان تحریک انصاف (پی ٹی آئی) نے اپنے ‘پلان سی’ کے تحت کل 12 دسمبر کو کراچی میں احتجاج کی تیاریاں مکمل کرلی ہیں، جس کے مطابق شہر میں دس سے زائد مقامات پر دھرنے دیئے جائیں گے۔

 پی ٹی آئی نے نماز جمعہ کے بعد شہرکی مختلف شاہراہوں پر دھرنے دینے کا اعلان کیا ہے، جس میں نیشنل ہائی وے، سہراب گوٹھ، نیٹی جیٹی پل، شیرشاہ، نمائش چورنگی، شاہراہ فیصل، کالاپل روڈ، حسن اسکوائر، اسٹارگیٹ اورفائیواسٹار چورنگی شامل ہیں۔

تحریک انصاف نے تاجروں اورٹرانسپورٹرز سے کاروباراور گاڑیاں رضاکارانہ طورپر جمعہ کی صبح سے ہی بند رکھنے کی اپیل کی ہے۔

اس حوالے سے تحریک انصاف کی جانب سے پمفلٹ بھی تقسیم کیے گئے ۔

دوسری جانب ایڈشنل آئی جی کراچی غلام قادر تھیبو نے خبردار کرتے ہوئے کہا کہ احتجاج سب کا حق ہے، لیکن اگر قانون ہاتھ میں لیا گیا تو کارروائی ہوگی۔

جبکہ کمشنرکراچی شعیب صدیقی نے امید ظاہر کی ہے کہ مظاہرین پرامن رہیں گے اورانتظامیہ سے تعاون کریں گے۔

دوسری جانب پاکستان تحریک انصاف نے احتجاج کو موثر بنانے کے لیے مختلف سیاسی جماعتوں سے رابطوں کا سلسلہ بھی جاری رکھا ہوا ہے۔

‘واضح رہے کہ عام انتخابات 2013 میں دھاندلی کے خلاف احتجاج کرنے والے عمران خان نے 30 نومبر کو اسلام آباد میں جلسے کے دوران اپنا ‘پلان سی پیش کیا تھا، جس کے پہلے مرحلے میں 8 دسمبر کو فیصل آباد بند کرانے کا اعلان کیا جب کہ اس کے بعد کراچی اور لاہور کے ساتھ ساتھ پورے ملک کو بند کرانا بھی اسی پلان کا حصہ ہے۔

آٹھ دسمبر کو فیصل آباد میں پی ٹی آئی اور مسلم لیگ (ن) کے کارکنان میں تصادم کے نتیجے میں تحریک انصاف کا ایک کارکن ہلاک جبکہ متعدد افراد زخمی ہوئے تھے۔