سyنیو یارک ۔۔۔۔جنوبی کوریا کی ایئر لائن کی اعلیٰ عہدیدار کے خلاف جہاز کی روانگی میں تاخیر کرانے کے حوالے سے تحقیقات ہو رہی ہیں۔ہیتھر ہو نامی چیف ایگزیکٹیو نے جہاز کی روانگی میں اس لیے تاخیر کرائی کہ جس طرح سے ان کو جہاز میں مونگ پھلی پیش کی گئی وہ طریقہ ان کو پسند نہیں آیا۔یہ واقعہ نیو یارک ہوائی اڈے پر گذشتہ جمعہ کو پیش آیا۔ جہاز نیو یارک سے جنوبی کوریا کے لیے روانہ ہونے والا تھا جب جہاز کو واپس ٹرمینل پر لایا گیا۔ہیتھر ہو نے مطالبہ کیا کہ مونگ پھلی غلط طریقے سے پیش کرنے پر جہاز کے عملے کو تبدیل کیا جائے۔کوریئن ایئر کا کہنا ہے کہ جہاز پر سروس کے معیار پر چیک رکھنا ہیتھر ہو کی ذمہ داری ہے اور اس سلسلے میں ان کو پائلٹ کی حماحت بھی حاصل تھی۔تاہم حکام کا کہنا ہے کہ ہیتھر ہو جہاز میں بطور مسافر سوار تھیں۔جنوبی کوریا کی مقامی میڈیا کا کہنا ہے کہ جہاز پر موجود ایک نئے سٹیورڈ نے ہیتھر کو مونگ پھلی پلیٹ کی بجائے پیکٹ میں پیش کی تھی۔ہیتھر نے سینیئر سٹیورڈ کو طلب کیا اور اور سروس کے بارے میں دریافت کیا اور حکم دیا کہ سینیئر سٹیورڈ کو جہاز سے اتار دیا جائے۔کوریئن ایئر کا کہنا ہے کہ جہاز کی روانگی میں 11 منٹ تاخیر ہوئی۔جنوبی کوریا کی ایوی ایشن حکام اس بات کی تحقیقات کر رہے ہیں آیا ہیتھر ہو نے کوئی قانون توڑا یا نہیں۔حکام کا کہنا ہے کہ ہیتھر بطور مسافر جہاز پر سوار ہوئی تھیں نہ کہ ایئر لائن کی سروس چیک کرنے کے لیے۔واضح رہے کہ ہیتھر ہو کوریئن ایئر کے سربراہ کی بیٹی ہیں۔