فیصل آباد۔۔۔۔تحریک انصاف کی جانب سے پیر کو ضلع بھر میں شٹر ڈاؤن احتجاج کی اپیل کی گئی ہے لیکن اس سے قبل ہی شہر میں ماحول انتہائی گرم ہوگیا ہے اور دونوں جماعتوں کے کارکن آمنے سامنے آگئے ہیں۔پاکستان تحریک انصاف کے چیرمین عمران کان کی جانب سے اپنے مطالبات کے حق میں اعلان کئے گئے پلان ’’سی‘‘ کے تحت پیر کو فیصل آباد میں شٹر داؤن ہڑتال اور احتجاج کیا جارہا ہے لیکن اس سے قبل ہی شہر کی سیاسی فضا انتہائی گرم ہوگئی ہے۔ شہر کے مختلف بازاروں میں تحریک انصاف نے شٹر ڈاؤن ہڑتال کے حق میں جب کہ مسلم لیگ (ن) کے حامی کاروباری حلقوں نے اس کی مخالفت میں بینرز آویزاں کررکھے ہیں۔ فیصل آباد کے مشہور گھنٹہ گھر چوک پر دونوں جماعتوں کے کارکنوں نے پوسٹرز اور پلے کارڈز اٹھاررکھے ہیں اور ایک دوسرے کے خلاف شدید نعرے بازی کی جا رہی ہے۔
حکومت کی جانب سے کسی بھی ناخوشگوار واقعے سے نمٹنے کے لئے ضلع بھر میں دو روز کے لئے موٹر سائیکل کی ڈبل سواری پر پابندی ہے اور ممکنہ تصادم کی صورت حال سے نمٹنے کے لئے دیگر اضلاع سے بھی پولیس کی نفری طلب کرلی گئی ہے۔ دوسری جانب تحریک انصاف کی ترجمان شیریں مزاری نے کہا ہے کہ حکومت نے مذاکرات کے لئے کوئی باقاعدہ رابطہ نہیں کیا لہذا فیصل آباد میں ہر صورت احتجاج ہو گا۔
واضح رہے کہ گزشتہ روز لاہور میں عمران خان کی الیکشن ٹریبونل میں پیشی کے موقع پر بھی تحریک انصاف کے حامی ’’گو نواز گو‘‘ اور مسلم لیگ (ن) کے کارکن ’’رو عمران رو‘‘ کے نعرے لگارہے تھے تاہم کوئی نا گوشگوار واقع رونما نہیں ہوا تھا۔