دبئی ۔۔۔۔۔دبئی میں کھیلے جانے والے دوسرے ٹیسٹ میچ کے چوتھے دن ابتدائی سیشن میں نیوزی لینڈ کے بولروں نے مزید تین پاکستانی وکٹیں حاصل کر لی ہیں۔اس وقت کریز پر پاکستان کی آخری بلے باز جوڑی سرفراز احمد اور راحت علی موجود ہیں اور پاکستان نے اب سے کچھ دیر قبل تک پہلی اننگز میں 320 رنز بنائے ہیں۔پاکستان کو اب بھی نیوزی لینڈ کی برتری کے خاتمے کے لیے مزید 83 رنز درکار ہیں۔جمعرات کو پاکستان نے چھ وکٹوں کے نقصان پر 281 رنز سے اننگز دوبارہ شروع کی تو یاسر شاہ سکور میں بغیر کوئی اضافے کیے پویلین لوٹ گئے۔مجموعی سکور میں صرف دو رنز کے اضافے کے بعد احسان عادل کی وکٹ گری۔ ان دونوں بلے بازوں کو ٹم ساؤدی نے آؤٹ کیا۔اس کے بعد نویں وکٹ کے لیے ذوالفقار بابر اور سرفراز احمد کے درمیان 25 رنز کی شراکت ہوئی۔ اس دوران سرفراز نے اپنی نصف سنچری بھی مکمل کی۔اس شراکت کا خاتمہ بولٹ نے ذوالفقار بابر کو آؤٹ کر کے کیا جنھوں نے پانچ رنز بنائے۔سرفراز پاکستان کے لیے اس اننگز میں نصف سنچری بنانے والے تیسرے بلے باز ہیں اس سے قبل اظہر علی نے چھ چوکوں اور ایک چھکے کی مدد سے 75 جبکہ یونس خان نے سات چوکوں اور دو چھکوں کی مدد سے 72 رنز بنائے تھے۔نیوزی لینڈ کی جانب سے ساؤدی اب تک تین وکٹوں کے ساتھ سب سے کامیاب بولر ہیں جبکہ سوڈھی اور بولٹ نے دو، دو وکٹیں لی ہیں۔نیوزی لینڈ نے اس میچ میں ٹاس جیت کر پہلے کھیلنے کا فیصلہ کیا تھا اور اس کی پوری ٹیم میچ کے دوسرے دن 403 رنز بنا کر آؤٹ ہوگئی تھی۔
واضح رہے کہ پاکستان نے پہلا میچ جیت کر سیریز میں ایک صفر کی برتری حاصل کر رکھی ہے