خیرپور(این یان آئی)رانی پور میں فاطمہ قتل کیس کے مجرم پیروں نے ورثا کو دھمکیاں دینے کے لیے ڈاکوئوں کا سہارا لے لیاہے۔تفصیلات کے مطابق پیر کے گھر کام کام کے دوران تشدد کا شکار ہونے والی کمسن ملازمہ فاطمہ کے ورثا کو کچے کے ڈاکوئوں نے جدید اسلحہ لے کر ویڈیو پیغام فاطمہ کے اہل خانہ کو بھیج دیا،جس میں دھمکی دی گئی ہے کہ پیر کی حویلی پرنظر اٹھائی یا فاطمہ فرڑو کی جو بھی آواز بنے گا اس کی خیر نہیں۔

ڈاکو دل خان جتوئی باگڑجی نے دھمکی آمیز ویڈیو پیغام میں فاطمہ کے اہل خانہ کو واضح کرتے ہوئے کہا کہ ہم حویلی کے پیر کے مرید ہیں، پیروں کی حویلیوں کی ہم خود حفاظت کریں گے۔کیس سے دستبردار ہونے اور دھمکیاں دینے والے 40 سے زائد افراد پر مقدمہ سرکار کی مدعیت میں درج کرلیا گیا ہے۔واضح رہے کہ گزشتہ دنوں رانی پورمیں بااثر پیر کے گھر کام کرنے والی 10 سالہ ملازمہ مبینہ جنسی زیادتی اور تشدد سے جاں بحق ہونے والی فاطمہ فرڑو کی قبر کشائی کے بعد پوسٹ مارٹم مکمل کرلیا گیا تھا۔دوسری جانب رانی پور میں پیر اسد شاہ کے گھر سے بھاگی ہوئی ایک اور ملازمہ ثانیہ نے بیان دیا تھا کہ فاطمہ کو ہمارے سامنے تشدد کر کے مارا گیا، پیرنی نے فاطمہ تک کو پانی نہیں دیا۔