لاہور ( این این آئی) معروف بزنس مین اظہر حسن سے 5کروڑ بھتہ لینے کا ڈراپ سین ہو گیا ، پولیس نے کارروائی کر کے سوتیلے بھائی کو گرفتار کر لیا ۔ سی آئی اے کینٹ پولیس نے بڑی کاروائی کرتے ہوئے بھتہ مانگنے والے ملزم کو گرفتار کر لیا ۔ گرفتار ملزم اقبال عرف شہزاد معروف بزنس مین اظہر حسن کا سوتیلا بھائی نکلا۔ ملزم خط کے ذریعے بھتہ نہ دینے پر مدعی مقدمہ کی پوری فیملی کو مارنے کی دھمکی دیتا،
ایس ایس پی کیپٹن (ر) لیاقت علی ملک نے ملزم کی گرفتاری کا ٹاسک ڈی ایس پی سی آئی اے کینٹ چوہدری فیصل شریف کو دیا۔چوہدری فیصل شریف نے بتایا کہ ملزم کو جدید ٹیکنالوجی کی مدد سے مختصر وقت میں گرفتار کر لیا،شہریوں کی جان و مال کا تحفظ سی آئی اے پولیس کی اولین ترجیح ہے۔ایس ایس پی کیپٹن (ر) لیاقت علی ملک نے ڈی ایس پی سی آئی اے کینٹ اور اس کی ٹیم کو شاباش اور تعریفی سرٹیفکیٹ دینے کا اعلان کیا ۔ انہوں نے کہا کہ پولیس پراسیکیوشن پارٹنرشپ کی مدد سے ملزم کو سخت سزا دلوائی جاے گی۔
