کراچی(این این آئی)کراچی کے علاقے کورنگی الیاس گوٹھ نواب تھلہ میں پانچویں کلاس کے کبیر نامی 12 سالہ طالبعلم والدہ کا دوپٹہ گلے میں ڈال کر پانی کی ٹنکی سے جھول گیا۔ریسکیو ذرائع کے مطابق والد کو بیٹا گھر کی چھت پر لٹکا ہوا ملا، بچے کو پھندے سے نکال کر اس کے والد اسپتال پہنچے تو بچے میں جان نہیں تھی۔اسپتال انتظامیہ نے قانونی چارہ جوئی کیلئے پولیس کو طلب کرلیا۔پولیس حکام کے مطابق انھیں مقامی اسپتال کی انتظامیہ کی جانب سے اطلاع ملی کہ ایک بچے کی لاش لائی گئی ہے جس کے بارے میں اس کے والدنے کہاکہ اس نے خود کشی کی ہے۔

پولیس حکام کے مطابق بچے کے والد نے بیان دیا ہے کہ بچہ کی غیر موجودگی پر جب اسے تلاش کیا گیا تو وہ انھیں پانی کی ٹینکی سے لٹکا ہوا ملا، جس پر انھوں نے کہ بچے کو اسپتال پہنچایا، جہاں ڈاکٹروں کا کہنا تھا کہ اس کی موت ہو چکی ہے۔والد کے بیان کے مطابق مبینہ خود کشی کرنے والا بچہ پانچویں کلاس کا طالب علم تھا، پولیس واقعے سے متعلق تحقیقات کر رہی ہے، ابتدائی طور پر خود کشی کی وجہ معلوم نہیں ہو سکی ہے۔