ابوظہبی (این این آئی)متحدہ عرب امارات نے ویزہ قوانین میں بڑی تبدیلیاں کر دیں، متعدد نئی ویزہ اقسام متعارف کروادیں۔آرٹیفیشل انٹیلجنس کے ماہرین کیلئے متحدہ عرب امارات نے خصوصی ویزہ جاری کرنے کا اعلان کیا جبکہ مختلف ایوئنٹس، فیسٹولز ، نمائشیں ، کانفرنسیں اور کھیلوں کی سرگرمیوں میں شرکت کے لیے نیا ایونٹ ویزہ بھی متعارف کرایا گیا ہے۔کروز شپ یا تفریحی شپ سے متحدہ عرب امارات آنے والے سیاحوں کو ملٹی پل انٹری ویزہ دیا جائے گا۔
اماراتی حکومت نے اعلان کیا ہے کہ جنگ یا قدرتی آفات سے متاثرہ افراد کو اسپانسر کے بغیر ایک سالہ رہائشی پرمٹ دیا جائے گا۔بیواوں اور طلاق یافتہ خواتین بھی اب بغیر اسپانسر رہائش حاصل کر سکیں گی، رشتہ داروں اور دوستوں کے وزٹ ویزہ کے لیے اسپانسر کی کم از کم آمدنی مقرر کر دی گئی ہے، دوست کو اسپانسر کرنے کے لیے کم از کم 15 ہزار درہم ماہانہ آمدنی ہونا ضروری ہے۔کاروباری افراد کے لیے بزنس ویزہ مالی ثبوت پر فراہم کیا جائے گا اس کے علاوہ بیرون ملک کمپنی رکھنے کو بزنس ویزا جاری کیا جائے گا، غیر ملکی ڈرائیورز کے ویزے صرف لائسنس یافتہ ٹرانسپورٹ کمپنی اسپانسر کر سکیں گی۔
