لاہور( این این آئی)پاکستان اور بھارت کے درمیان مختصر فوجی تنازعہ اور سرحدوں کی مسلسل بندش کے باوجود مئی میں تجارتی سرگرمیاں جاری رہیں۔سرکاری اعداد و شمار کے مطابق مالی سال 2025کے جولائی تا مئی کے دوران بھارت سے درآمدات 3سال کی بلند ترین سطح پر پہنچ گئیں۔اعداد و شمار میں بتایا گیا ہے کہ مالی سال 2025کے پہلے 11ماہ میں بھارت سے درآمدات 21کروڑ 50لاکھ ڈالر تک پہنچ گئیں جو مالی سال 2024میں 20کروڑ 70لاکھ ڈالر اور مالی سال 2023 میں 19کروڑ ڈالر سے زیادہ ہیں، صرف مئی کے مہینے میں جب پہلے ہفتے میں 4روزہ تنازعہ ہوا، درآمدات ڈیڑھ کروڑ ڈالر رہیں، جو پچھلے سال کے اسی مہینے میں ایک کروڑ 70لاکھ ڈالر تھیں۔

تاہم بھارت کو پاکستان کی برآمدات نہ ہونے کے برابر رہیں، مئی میں برآمدات صرف ایک ہزار ڈالر ریکارڈ کی گئیں جبکہ مالی سال 2025 کے جولائی تا مئی کے دوران مجموعی برآمدات صرف 5لاکھ ڈالر رہیں، مالی سال 2024اور 2023میں برآمدات بالترتیب 34لاکھ 40ہزار ڈالر اور 3لاکھ 30 ہزار ڈالر تھیں، جو دونوں ممالک کے درمیان تجارتی تعلقات کی یک طرفہ نوعیت کو ظاہر کرتی ہیں۔ تاجر اس کشیدہ صورتحال کے دوران درآمدات کے تسلسل پر بات کرنے سے گریزاں نظر آئے، ایک تاجر نے اشارہ دیا کہ یہ اشیا ء تیسرے ملک کے ذریعے آئی ہوں گی اور ان کی ادائیگیاں جنگ سے پہلے کی گئی ہوں گی۔