اسلام آباد (نیوز ڈیسک) فیڈرل بورڈ آف ریونیو (ایف بی آر) نے ملک میں اسمگلنگ کے خلاف کارروائیوں کو مزید مؤثر بنانے کے لیے نیا اقدام متعارف کرا دیا، جس کے تحت عوام کو پانچ لاکھ روپے تک کے انعامات حاصل کرنے کا موقع فراہم کیا گیا ہے۔تفصیلات کے مطابق، ایف بی آر نے “کسٹمز کمانڈ فنڈ” کے نام سے ایک نیا فنڈ قائم کیا ہے، جس کا مقصد انسداد اسمگلنگ کے لیے درکار وسائل اور سازوسامان کی فراہمی کو یقینی بنانا ہے۔ یہ فنڈ لاجسٹک سپورٹ، ٹیکنیکل آلات اور دیگر آپریشنل ضروریات کو پورا کرے گا۔
ایف بی آر کی جانب سے اعلان کیا گیا ہے کہ جو کوئی بھی اسمگلنگ سے متعلق درست اور قابل اعتماد معلومات فراہم کرے گا، اسے 500,000 روپے تک انعام دیا جائے گا۔ اس اقدام کا مقصد عوام کو اسمگلنگ کے خلاف مہم میں شریک کرنا ہے۔اس کے ساتھ ساتھ، ایسے کسٹم افسران جو اسمگلنگ کے خلاف کامیاب کارروائیوں میں حصہ لیتے ہیں، انہیں بھی خصوصی مراعات دی جائیں گی تاکہ ان کی حوصلہ افزائی کی جا سکے۔یہ حکمت عملی نہ صرف غیر قانونی تجارت کو روکنے میں مدد دے گی بلکہ قانونی کاروبار کی حفاظت، شفاف تجارتی ماحول کی ترویج اور قومی ریونیو میں بہتری لانے میں بھی معاون ثابت ہوگی۔
