اسلام آباد (نیوز ڈیسک) کراچی سے اوکاڑہ بھیجا جانے والا سولر پلیٹوں سے لدا کنٹینر دو دن بعد شکارپور کے ٹول پلازہ کے قریب خالی حالت میں کھڑا ہوا ملا، جب کہ کنٹینر کے دونوں ڈرائیور لاپتہ ہیں۔متاثرہ تاجر کے مطابق جمعے کو کراچی سے 720 سولر پلیٹس پر مشتمل کنٹینر روانہ کیا گیا تھا، جس میں ڈیڑھ کروڑ روپے سے زائد مالیت کی اشیاء موجود تھیں۔ تاہم ہفتے کی شب اچانک ڈرائیوروں کے موبائل فون بند ہو گئے، جس کے بعد ان سے کوئی رابطہ نہ ہو سکا۔

پیر کے روز اطلاع ملی کہ کنٹینر شکارپور ٹول پلازہ پر کھڑا ہے۔ تاجر جب وہاں پہنچا تو اسے کنٹینر مکمل طور پر خالی ملا جبکہ دونوں ڈرائیور غائب تھے۔ واقعے کی اطلاع مقامی پولیس کو دے دی گئی، تاہم ابتدائی طور پر کوئی مقدمہ درج نہیں کیا گیا۔شکارپور کے تھانہ فوجداری کے ایس ایچ او کا کہنا ہے کہ موبائل فونز کا آخری سگنل ضلع خیرپور کے علاقے گمبٹ میں ملا، لہٰذا وقوعہ کی اصل جگہ وہی تصور کی جائے گی اور قانونی کارروائی بھی وہیں کی جائے گی۔تاجر نے خدشہ ظاہر کیا ہے کہ یہ منظم واردات ہو سکتی ہے، جبکہ پولیس کا کہنا ہے کہ واقعے کی مکمل چھان بین کی جائے گی اور لاپتہ ڈرائیوروں کی تلاش جاری ہے۔