ریاض(سی پی پی )خلیج کی 2 امیر ترین ریاستوں سعودی عرب اور متحدہ عرب امارات نے ٹیکس کی چھوٹ ختم کرنے کا اعلان کردیا۔سعودی میڈیا رپورٹس کے مطابق سعودی عرب اور متحدہ عرب امارات حکومت کی جانب سے جمعرات کو جاری کردہ بیان میں کہا گیا کہ ٹیکس کی چھوٹ کو ختم کرنے کیلئے اقدامات تیز کیے جائیں اور دیگر خلیجی ممالک بھی آئندہ برسوں میں اپنی اپنی ٹیکس اسکیموں کا اعلان کرنے والے ہیں،

سعودی عرب اور متحدہ عرب امارات یکم جنوری 2018 سے سامان و سروسز پر 5 فیصد ٹیکس لگانے والے ہیں۔بیان میں کہا گیا کہ یہ قدم عالمی منڈی میں تیل کی قیمتوں میں کمی کی وجہ سے ملکی آمدنی گھٹنے کے سبب اٹھایا گیا ہے اور اس کا مقصد کچھ اضافی منافع حاصل کرنا ہے،ویلیو ایڈڈ ٹیکس کھانے پینے کی اشیا، کپڑوں، الیکٹرونک مصنوعات، گیسولین، فون، پانی، بجلی اور ہوٹل کی قیمتوں پر لاگو ہوگا،جبکہ مکانات کے کرائے، پراپرٹی، چند

ادویات، ہوائی جہاز کے ٹکٹس اور اسکولوں کی ٹیوشن فیس جیسے اخراجات کو فی الحال ٹیکس سے استثنی حاصل ہے۔دوسری جانب متحدہ عرب امارات میں تعلیم کے شعبے میں بھی ٹیکس متعارف کرایا جا رہا ہے۔ابوظہبی سے شائع ہونے والے نیشنل اخبار کے مطابق ویلیو ایڈڈ ٹیکس کی وجہ سے رواں برس کے مقابلے میں اگلے برس متحدہ عرب امارات میں رہائش کی لاگت 2.5 فیصد بڑھ جائے گی جبکہ تنخواہیں اتنی ہی رہیں گی۔