ایڈن پارک (این این آئی)سری لنکا کے خلاف پہلے ون ڈے میں بیٹنگ کرتے ہوئے نیوزی لینڈ کے کھلاڑی فن ایلن وکٹ پر گیند لگنے کے باوجود ناٹ آئوٹ قرار پائے۔

ایڈن پارک میں کھیلے گئے تین ون ڈے میچز کی سیریز کے پہلے میچ میں نیوزی لینڈ نے سری لنکا کو جیت کیلئے 275 رنز کا ہدف دیا تھا، جواب میں سری لنکن ٹیم 20 ویں اوور کی پانچویں گیند پر 76 رنز بنا کر آئوٹ ہوگئی اور اس طرح نیوزی لینڈ کی ٹیم 198 رنز سے فتحیاب ہوئی۔اننگز کے تیسرے اوور میں قسمت نے فن ایلن کا اس وقت ساتھ دیا جب وہ سری لنکن بولر راجنتھا کی بولنگ کا سامنا کررہے تھے کہ گیند ان کی وکٹوں پر جاکر لگی اور وہ تقریباً آئوٹ ہو چکے تھے مگر اسٹمپ نہ گرنے کے باوجود وہ ناٹ آئوٹ رہے، اس وقت فن ایلن 9 رنز پر بیٹنگ کر رہے تھے۔واضح رہے کہ بیٹر کے آئوٹ ہونے کیلئے وکٹوں پر موجود کم از کم ایک بیلز کا گرنا ضروری ہوتا ہے۔وکٹوں پر گیند لگنے کے باوجود فن ایلن کے آئوٹ نہ ہونے کی ویڈیو سوشل میڈیا پر بھی وائرل ہوگئی ہے۔