لاہور /قصور ( این این آئی) پاکستان مسلم لیگ (ن) کی سینئر نائب صدر و چیف آرگنائزر مریم نواز نے کہا ہے کہ نواز شریف شیر لیڈر ہے جو کارکنوں کی ڈھال بنا تھااور بیٹی کے ساتھ لندن سے آکر جیل گیا ، زمان پارک کا گیدڑ عورتوں بچوں کو ڈھال بنائے ہوئے ہے اور عدالتی احکامات کے ٹکڑے ٹکڑے کررہا ہے ،
سازشی کرداروں سے مکمل نجات نہیں ملی، آر ٹی ایس کی جگہ بابا زحمت کے چیلوں نے لے لی ہے، ووٹ کی عزت کے لئے ترازو کے پلڑے برابر کرنے کی فیصلہ کن جدوجہد جاری ہے، ترازو برابر ہوگا تو انصاف کی فتح ہوگی،پاکستان مسلم لیگ (ن) پاکستان اور اس کی اکائیوں کے مفادات کا تحفظ کرنے کی صلاحیت رکھتی ہے،الیکشن لڑیں گے اور جیتیں گے، سلیکشن پہلے قبول کی نہ آئندہ ہونے دیں گے۔ان خیالات کا اظہار انہوں نے گزشتہ روز پھول نگر کے تنظیمی دورے کے موقع پر لاہور ڈویژن کے اجلاس کی صدارت کرتے ہوئے کیا ۔ اجلاس میں صدر پاکستان مسلم لیگ (ن) پنجاب رانا ثنااللہ، وفاقی وزیر تعلیم رانا تنویر حسین، رانا اقبال، ڈویژنل صدر شیخ وسیم سمیت دیگر شریک ہوئے ۔ اجلاس میں پارٹی کے تنظیمی ڈھانچے اور اس کی کارکردگی کا جائزہ لیا گیا ۔ مریم نواز نے دور آزمائش میں پارٹی کے مدر اور ذیلی ونگز کی قربانیوں اور ثابت قدمی کو سراہا ۔ انہوں نے کہا کہ الیکشن لڑیں گے اور جیتیں گے، سلیکشن پہلے قبول کی نہ آئندہ ہونے دیں گے۔سازشی کرداروں سے مکمل نجات نہیں ملی، ووٹ کی عزت کے لئے ترازو کے پلڑے برابر کرنے کی فیصلہ کن جدوجہد جاری ہے، ترازو برابر ہوگا تو انصاف کی فتح ہوگی۔انہوں نے کہا کہ آر ٹی ایس کی جگہ بابا زحمت کے چیلوں نے لے لی ہے، پاکستان مسلم لیگ (ن) پاکستان اور اس کی اکائیوں کے مفادات کا تحفظ کرنے کی صلاحیت رکھتی ہے۔مسلم لیگ (ن) نے ہمیشہ قوم کو عزت، معاشی ترقی اور سہولت دی۔
مریم نواز نے کہا کہ نواز شریف شیر لیڈر ہے جو کارکنوں کی ڈھال بنا تھا، زمان پارک کے گیدڑ کو دیکھ لو جو عورتوں بچوں کو ڈھال بنائے ہوئے ہے، نواز شریف جھوٹے مقدمات میں اپنی بیٹی کے ساتھ لندن سے جیل چلاگیا، یہ ہوتی ہے بہادری، ایک گیدڑ زمان پارک سے عدالت جانے سے ڈرتا ہے، یہ پولیس اور رینجرز اہلکاروں کے نہیں عدالت اور ججوں کے سر پھاڑ رہا ہے،ملک کے ٹکڑے کرنے کی باتیں کرنے والا عدالتی احکامات کے ٹکڑے ٹکڑے کر رہا ہے۔
انہوں نے کہا کہ مسلم لیگ (ن) کے نوجوان پاکستان کی عزت، حرمت اور تہذیب کے علم بردار ہیں، نوجوانوں اور خواتین کا جذبہ دیکھ کر ہر روز فخر کرتی ہوں، بڑا اعزاز ہے کہ آپ جیسے شیروں اور شیرنیوں کے ساتھ مل کرکام کرنے کا موقع ملا ہے، کارکن ہونے سے بڑا کوئی اعزاز نہیں۔نواز شریف، شہباز شریف کی قیادت میں ٹیم پاکستان کا کردار ادا کرنا ہے۔عہدیداروں اور کارکنوں منے مریم نواز کو سینئر نائب صدر اور چیف آرگنائزر بننے پر خیر مقدم کرتے ہوئے کہا کہ آپ نے پوری تنظیم کو چند ہفتوں میں زندگی کردیا ہے، آپ کے آنے سے کارکنوں کو آواز ملی ہے۔
