لاہور(این این آئی)صدر مملکت ڈاکٹر عارف علوی اور تحریک انصاف وسطی پنجاب کی صدر ڈاکٹر یاسمین راشد کی مبینہ آڈیو منظر عام پر آگئی۔سامنے آنے والی مبینہ آڈیو میں ڈاکٹر یاسمین راشد نے صدر عارف علوی سے کہا کہ سر یہاں پر صورتحال بہت خراب ہے،

ہمارے ورکرز نے پیٹرول بم پھینکنا شروع کردئیے ہیں۔اس سے پہلے کہ خون خرابا ہو، میرا خیال ہے آپ کو کسی سے بات کرنے کی ضرورت ہے۔یاسمین راشد کی بات پر صدر عارف علوی نے کہا کہ میں نے بات کرلی ہے۔یاسمین راشد نے کہا کہ آپ ان سے کہہ دیں کہ میں بات کرلیتا ہوں عمران خان سے۔صدر عارف علوی نے کہا کہ میں سمجھا نہیں آپ کیا کہہ رہی ہیں۔ڈاکٹر یاسمین راشد نے کہا کہ دیکھیں کچھ مر جائیں گے، صورتحال اتنی بری ہو جائے گی کہ الیکشن ملتوی ہوجائیں گے، کچھ پولیس والے مرجائیں گے۔یاسمین راشد نے کہا کہ میرا خیال ہے آپ خان صاحب کو کہیں کہ give in، باقی آپ کی مرضی۔انہوں نے کہا کہ ابھی رینجرز وہاں پر ہے، پیٹرول بم چل رہے ہیں، ان کی واٹر کینن کو آگ لگ گئی ہے، میں تو باہر ہوں۔صدر عارف علوی نے کہا کہ میں اسد عمر سے بات کرتا ہوں۔اس پر یاسمین راشد نے کہا کہ آپ شاہ صاحب سے بھی بات کرلیں وہ خان صاحب کے ساتھ ہیں۔