لاہور ( این این آئی) انسپکٹر جنرل پولیس پنجاب ڈاکٹر عثمان انور نے کہا ہے کہ پی ٹی آئی کارکنان کی کارروائیوں پر دہشتگردی کا پرچہ ہوتا ہے، ہماری پالیسی یہی ہے کہ کسی کا نقصان نہ ہو۔انہوں نے نجی ٹی وی سے گفتگو کرتے ہوئے کہا کہ زمان پارک میں آپریشن نہیں وارنٹ کی تکمیل ہورہی ہے، ڈی آئی جی اسلام آباد کی قانون کے مطابق مدد کی، قانون سب کے لیے برابر ہے۔آئی جی پنجاب نے کہا کہ ہم عمران خان کے ناقابل ضمانت وارنٹ لے کر گئے تو پولیس پر پتھرائو کیا گیا اور اب تک 54 پولیس اہلکار زخمی ہوچکے ہیں، پھر بھی پولیس والے سینہ تان کر کھڑے ہیں، ہم مسلح ہوکر زمان پارک نہیں جارہے، ہماری پالیسی یہی ہے کہ کسی کا نقصان نہ ہو۔آئی جی عثمان انور کا کہنا تھا کہ پی ٹی آئی کے کارکنوں نے پولیس کو پیٹرول بم مارے، پولیس گاڑی، واٹر بازر کو آگ لگائی، ڈی جی پی آر کی گاڑی کو تباہ کیا، رینجرز اور ایلیٹ کی گاڑیوں کو بھی نقصان پہنچایا، ایسی کارروائیوں پر دہشتگردی کا پرچہ ہوتا ہے۔