لاہور (مانیٹرنگ ڈیسک )رینجرز اورپولیس نے عمران خان کی رہائش گا ہ کو چاروں طرف سے گھیر لیا ۔ تین صوبوں کی پولیس کی جانب سے پاکستان تحریک انصاف کے چیئرمین و سابق وزیراعظم کی گرفتاری کیلئے 18گھنٹوں سے زمان پارک میدان جنگ بن ہوا ہے ،

تاہم ابھی تک پولیس عمران خان کو گرفتار کرنے میں کامیاب نہیں ہو سکی ہے ۔تازہ ترین صورتحال کے مطابق رینجرز اورپولیس نے عمران خان کی رہائش گا ہ کو چاروں طرف سے گھیر لیا جبکہ کارکنا ن کی جانب سے بھرپور مذاحمت کی جارہی ہے ۔ پولیس اور پی ٹی آئی کارکنوں کے درمیان تصادم کا سلسلہ جاری ہے ۔دنیا نیوز کے مطابق اسلام آباد پولیس تحریک انصاف کے چیئرمین عمران کو توشہ خانہ کیس میں تاحال گرفتارکرنے میں ناکام ہے جبکہ زمان پارک کے باہر پاکستان تحریک انصاف (پی ٹی آئی) اور پولیس کے درمیان کشیدگی برقرار ہے۔پی ٹی آئی چئیرمین عمران خان کی گرفتاری کے معاملے پر پی ٹی آئی اور پولیس آمنے سامنے ہیں، بدھ کی صبح ایک بار پھر پی ٹی آئی اور پولیس اہلکاروں میں تصادم ہوا، پولیس نے مظاہرین پر شیلنگ کی، پولیس آپریشن کو18 گھنٹے گزر چکے ہیں، تین اضلاع کی پولیس آپریشن میں حصہ لے رہی ہے، رینجرز کے دستے بھی مال روڈ پر موجود ہیں۔مال روڈ، دھرمپورہ اور زمان پارک پوری رات ميدان جنگ بنا رہا، رات بھر پی ٹی آئی کارکنان اور پوليس کے درميان جھڑپوں کا سلسلہ جاری رہا، پتھراو سے ڈی پی او شیخوپورہ زاہد نواز مروت اور ایس پی عمارہ شیرازی بھی زخمی ہوگئیں۔پتھراؤ کے نتیجے میں درجنوں پولیس اور ڈولفن اہلکار زخمی ہوئے، سی سی پی او لاہور بلال صدیق کمیانہ، ڈی آئی جی آپریشنزافضال کوثر اور سہيل سکھیرا تمام رات مال روڈ پر موجود رہے، قصور،شیخوپورہ اور گوجرانوالہ ڈویژن سے آنیوالی پولیس فورس اور رينجرز اہلکاروں نے زمان پارک کو تینوں اطراف سے گھیرے ميں لے لیا۔