اداکارہ زرنش خان نے عمرہ کے بعد انسٹاگرام سے اپنی تصاویر ڈیلیٹ کر دیں

کراچی (این این آئی)پاکستانی اداکارہ زرنش خان نے شب معراج کے موقع پر عمرے کی سعادت حاصل کرلی۔حال ہی میں اداکارہ نے شب معراج کی رات خانہ کعبہ سے اپنی تصاویر شیئر کرتے ہوئے مداحوں کو عمرے کی سعادت حاصل کرنے کی اطلاع دی۔

زرنش خان نے انسٹااسٹوری کے ذریعے مداحوں سے عمرے کا تجربہ بھی شیئر کیا جس میں اداکارہ نے لکھا تھا کہ یہاں آکر اندازہ ہوتا ہے ہم کتنے بھٹکے ہوئے ہیں،کیا مقصد ہے دنیا میں آنے کا، کیا فرائض ہیں سب بھولے بیٹھے ہیں، نہ اخلاقیات ، نہ انسانیت، نہ اصول، نہ احسان، نہ احساس اور نہ خیال، بس دنیا کی دوڑ میں ہیں سب، کاش کہ ہم سب کو خاص طور پر مجھے اللہ پاک ہمیں ہمیشہ کیلئے ہدایت دے دیں ۔اداکارہ نے اپنی انسٹااسٹوری میں دعا کرتے ہوئے کہا کہ اللہ پاک ہم سب کو بار بار اپنے گھر آنے کی مہلت دیں۔بعد ازاں اداکارہ کی جانب سے اپنی ذاتی تصاویر کو بھی ہائیڈ کردیاگیا اداکارہ کی  انسٹاگرام پر اب صرف اسلامک تصاویر واضح ہیں۔