لاہور(آن لائن)بے نظیر بھٹو قتل کیس کی اپیلیں کئی سال کے بعد سماعت کیلئے مقرر کرلی گئیں،پیپلزپارٹی کی شہید چیئرپرسن بے نظیر بھٹو قتل کیس کی اپیلیں لاہور ہائیکورٹ راولپنڈی بینچ میں سماعت کیلئے مقرر کرلی گئی ہیں۔چیف جسٹس لاہور ہائی کورٹ کی جانب سے تشکیل دیئے گئے

خصوصی ڈویژن بینچ میں جسٹس مرزا وقاص اور جسٹس چوہدری عبدالعزیز شامل ہیں جو 8 اپیلوں پر کل سماعت کریں گے۔حکومت نے بے نظیر قتل کیس کے ملزمان کی بریت کے خلاف اپیل دائر کر رکھی ہے، جب کہ سزا کیخلاف پولیس افسران سعود عزیز،خرم شہزاد کی اپیل پر بھی سماعت ہوگی، دونوں پولیس افسران سعود عزیز اور خرم شہزاد ضمانت پر ہیں۔ دونوں کو 17، 17 سال قید اور 10، 10 لاکھ روپے جرمانے کی سزا سنائی گئی تھی،ملزمان کی سزائیں بڑھانے کیلئے آصف زرداری کی اپیل بھی سنی جائے گی۔عدالت کی جانب سے آصف زرداری، بری ہونے والے ملزمان، مرحوم سابق صدر جنرل (ر) پرویز مشرف اور سزا یافتہ پولیس افسران کو نوٹس جاری کر دیے گئے ہیں، پرویز مشرف اس کیس میں اشتہاری ہیں تاہم ان کی وفات کے بعد ان کے خلاف اپیل خارج ہونے کا امکان ہے۔