نئی دہلی(مانیٹرنگ ڈیسک) بنگلہ دیشی لڑکی دریا میں تیر کر شادی کرنے بھارت پہنچ گئی۔ انڈیا ٹائمز کے مطابق اس 22سالہ لڑکی کی شناخت کرشنا دیوی کے نام سے بتائی گئی ہے جس کی فیس بک پر بھارت کے نوجوان ابھیک منڈل کے ساتھ

ملاقات ہوئی اور دونوں ایک دوسرے سے محبت کرنے لگے۔کرشنا کے پاس چونکہ پاسپورٹ نہیں تھا لہٰذا اس نے غیرقانونی طور پر بارڈر عبور کرنے کا فیصلہ کر لیا۔ وہ جان جوکھوں میں ڈال کر بنگلہ دیش اور بھارت کے بارڈر پر واقع سندر بن نامی جنگل سے گزری جس میں بنگالی ٹائیگرز بڑی تعداد میں پائے جاتے ہیں۔ جنگل سے گزر کر وہ بنگلہ دیش سے بھارت میں داخل ہونے والے دریا پر پہنچی اور اس میں تیرتی ہوئی بھارت میں داخل ہوگئی۔رپورٹ کے مطابق ابھیک کلکتہ کا رہائشی ہے۔ کرشنا اور اس کی شادی کی رسومات کالی گھاٹ مندر میں ہوئیں۔ تاہم شادی کے اگلے روز ہی کرشنا کو پولیس نے غیرقانونی طور پر ملک میں داخل ہونے کے جرم میں گرفتار کر لیا۔ ذرائع کا کہنا ہے کہ کرشنا کو ممکنہ طور پر بنگلہ دیش ہائی کمیشن کے حوالے کر دیا جائے گا جو اسے واپس بنگلہ دیش پہنچا دے گا۔