اسلام آباد(نیوزڈیسک)۔ پاکستان کرکٹ بورڈ نے رائٹ سائزنگ کے نام پر چھانٹیاں شروع کر دی ہیں اور پہلے مرحلے میں انٹرنیشنل اور ڈومیسٹک کرکٹ ڈائریکٹرز کے عہدے ختم کر دئیے گئے ہیں۔اگلے مرحلے میں 60 سال سے زائد عمر ملازمین اور بورڈ کے غیر فعال ریڈیو سٹیشن میں کام کرنے والوں کو جامع چھان بین کے بعد رخصت کیا جائے گا۔پی سی بی چیئرمین شہر یار خان نے نجی ٹی وی سے گفتگو میں تصدیق کرتے ہوئے بتایا کہ ملازمین کی چھانٹی جلد بازی میں نہیں بلکہ مرحلہ وار ہو گی۔بورڈ نے جنرل مینیجرز کے ذریعے انٹرنیشنل اور ڈومیسٹک کرکٹ کے محکموں کو چلانے اور لوڈ کم کرنے کیلئے مختلف محکموں کو ضم کرنے کا بھی فیصلہ کیا ہے۔شہر یار نے بتایا کہ اِ س وقت پی سی بی سیٹ اپ میں نو ڈائریکٹرز کام کررہے ہیں اور چیف آپریٹنگ افسر کا سب سے مسلسل رابطہ رکھنا بہت مشکل ہے ٗ ایسی صورت میں ڈائریکٹرز کی تعداد میں بتدریج کمی لائے جائیگی۔
شہر یار نے انتخاب اور ذاکر کے مستقبل کے حوالے سے بتایا کہ انہیں دوسرے موزوں عہدوں پر تعینات کیا جا سکتا ہے۔انتخاب عالم بہت سینئر کرکٹراور پی سی بی کے ملازم ہیں ہم انہیں کوئی دوسری اہم ذمہ داری سونپیں گے تاہم فی الحال میں اس معاملے پر مزید کچھ نہیں کہہ سکتا ۔چیئرمین نے تسلیم کیا کہ دو افراد کا کوٹہ ہونے کے باوجود بورڈ آف گورنرز میں کوئی کرکٹر موجود نہیں ٗتاہم اس حوالے سے ایک آئینی ترمیم کی ضرورت ہے ، جس میں وقت لگ سکتا ہے۔