اسلام آباد (این این آئی)انسانی حقوق کمیشن برائے پاکستان نے ملک میں غذائی بحران پرتشویش کا اظہار کیا ہے ۔ایچ آر سی پی کے مطابق سستے آٹے کیلئے دھکم پیل کے واقعات وفاقی اور صوبائی حکومتوں کیلئے واضح تنبیہ ہیں، میرپورخاص میں ایک مزدورجاں بحق اور نواب شاہ میں متعدد خواتین زخمی ہوئیں۔ایچ آرسی پی نے کہا کہ بڑھتی مہنگائی، خوراک کی قلت ملک کو انسانی حقوق کے بحران کی طرف دھکیل رہی ہے، تقسیم کا ناقص طریقہ، بڑے پیمانے پربرطرفیاں ملک کو بحران کی طرف دھکیل رہی ہیں۔انسانی حقوق کمیشن کے مطابق مزدور ہرسنگھ کوہلی کی موت کی انکوائری کاغذی کارروائی سیزیادہ کچھ نہیں، 6 بچوں کا باپ غذائی عدم تحفظ کا پہلا شکار نہیں۔کمیشن نے کہا کہ ریاست نے پورے ملک میں سستے داموں خوراک کی منصفانہ تقسیم کو ترجیح نہیں دی تو ایسے واقعات ہوتے رہیں گے۔