حیدرآباد (آن لائن )حیدرآباد کے علاقے لطیف آباد میں ریاست کے خلاف نعرے لگانے پر پولیس نے متحدہ قومی مومنٹ (ایم کیو ایم) لندن کیکارکن کو گرفتار کرکے مقدمہ درج کرلیا۔ میڈیا رپورٹ کے مطابق 5 جنوری کو اے-سیکشن تھانے کے سَب انسپکٹر کی شکایت پر
ملزم کے خلاف ایف آئی آر تعزیرات پاکستان کی دفعات 123 (اے)، 124 (اے) اور 34 کے تحت درج کیا گیا تھا۔پولیس حکام کا کہنا تھا کہ مشتبہ ملزمان نثار پنہور، عبدالرشید بھیہ (سابق ڈپٹی مئیر ایچ ایم سی) راحیل، عبدالمجید خان، ایم کیو ایم لندن کے کارکن شکیل ضیا سمیت 4 سے 5 ملزمان نے لطیف آباد یونٹ 7 میں شادی کی تقریب کے دوران الطاف حسین کی حمایت اور پاکستان مخالف نعرے لگائے تھے۔انہوں نے بتایا کہ سی سی ٹی وی کیمرہ سے ثابت ہوا ہے کہ مشتبہ ملزمان نے ریاست کے خلاف نعرے لگائے تھے۔پولیس نے حیدرآباد ڈسٹرکٹ بار ایسوسی ایشن کے رکن اور ایم کیو ایم لندن کے کارکن شکیل ضیا کا ریمانڈ حاصل کرنے کے لیے سول جج کی عدالت میں پیش کیا۔حیدرآباد ڈسٹرکٹ بار ایسوسی ایشن کے رہنماؤں نے کیس میں ملزم کی ضمانت حاصل کرنے کے لیے اس معاملے کو سیشن جج کے ساتھ اٹھایا۔کیس میں ایک اور ملزم عبدالمجید کو بھی عدالت میں پیش کیا گیا تھا۔
