پشاور(این این آئی) عوامی نیشنل پارٹی خیبرپختونخوا کے صدر ایمل ولی خان نے کہا ہے کہ 23 دسمبر چھوڑیں، کل اسمبلیاں توڑیں، ہم الیکشن کیلئے تیار ہیں، آپ کل اسمبلیاں توڑیں، میں آج امیدواران کا اعلان کرتا ہوں،لکھ کے لے لیں اعلان تو کردیا یہ لیکن یہ صاحب اسمبلیاں نہیں توڑیں گے۔

باچاخان مرکز پشاور میں میٹروپولیٹن پشاور کے یوتھ کنونشن سے خطاب کرتے ہوئے اے این پی کے صوبائی صدر ایمل ولی خان نے کہا کہ انہوں نے پاکستان کا نام پوری دنیا میں شرمسار کر دیا، دنیا کہے گی کہ یہ ایسے لوگ ہیں جن کو تحفوں کی قدر نہیں۔یہ دوسروں کو چور کہتے ہیں یہ خود سب سے بڑا چور ہے۔ پنجاب کو کنگال اور ملکی معیشت کو تباہ کر دیا، آج بھاگنا چاہتا ہے۔ انہوںنے کہا کہ اٹھارویں ترمیم کے ذریعے غیر جمہوری قوتوں کا راستہ روکا گیا اسلئے ہمیں پارلیمنٹ سے باہر رکھا گیا کیونکہ ہم نے اٹھارہویں آئینی ترمیم کے ذریعے صوبوں اور عوام کو انکا حق دلوایا۔ انہوں نے سوال اٹھایا کہ عوام کی طاقت کا محور اسمبلی کو تحلیل کی وجہ کیا ہے؟ کیا وجہ ہے کہ جن سے کرسی لی گئی ہے، انکو واپس لایا جائے؟ عمران نیازی جیسا جھوٹا شخص تاریخ میں کبھی ملا نہیں اسی شخص کی جماعت نے پختونخوا میں آئین و قانون کی دھجیاں اڑائیں۔ پختونخوا میں آئین و قانون کدھر ہے؟ بی آر ٹی، مالم جبہ کی تحقیقات کون کرے گا؟ہسپتالوں کو ایم ٹی آئی ایکٹ کے ذریعے تباہ کرنے کا جواب کون دے گا؟ پختونخوا میں آئین و قانون کو تباہ کر دیا گیا۔ملک میں جاری دہشتگردی کی صورتحال پر گفتگو کرتے ہوئے ایمل ولی خان نے کہا کہ خیبرپختونخوا کو دہشتگردی اور جنگ کا میدان بنانے کی تیاریاں زوروشور سے جاری ہیں۔آئے روز پولیس اہلکاروں پر حملے ہورہے ہیں، لوگ شہید ہورہے ہیں لیکن اقتدار کے ایوانوں میں خاموشی ہے۔اس سال 2022ئ￿ میںپولیس پر سینکڑوں حملے ہوئے جس میں 105پولیس اہلکار شہید ہوچکے ہیں۔ انہوں نے کہا کہ یہ سال پختونخوا کیلئے بدترین سال رہا جس میں ٹارگٹ کلنگ عروج پر پہنچ چکی ہے۔ہم واضح کرچکے ہیں کہ دہشتگردی کے لئے اب پختونخوا کی سرزمین استعمال نہیں ہونے دیں گے۔