لاہور( این این آئی)صوبہ پنجاب کے سینئر وزیر میاں اسلم اقبال نے دعوی کیا ہے کہ وزیراعلی پرویز الٰہی اسمبلی توڑنے کی سمری عمران خان کو دے چکے ہیں۔ نجی ٹی وی کے مطابق میاں اسلم اقبال نے کہا کہ اسمبلیاں دسمبر میں ہی توڑی جائیں گی، اس حوالے سے حتمی فیصلہ کرلیا گیا ہے۔علاوہ ازیں صوبائی وزیر صحت وصدرپی ٹی آئی وسطی پنجاب ڈاکٹریاسمین راشدنے زمان پارک میں چیئرمین پاکستان تحریک انصاف عمران خان سے ملاقات کی۔اس موقع پر حماداظہر،کرنل(ر)اعجازمنہاس،طارق ثناء باجوہ،طارق حمید،احمدطحہ،شنیلاعلی،فیض الحسن شاہ سمیت دیگر بھی موجود تھے۔ ملاقات میں ملکی سیا سی صورتحال بارے تبادلہ خیال ہوا۔