اسلام آباد(آن لائن) وفاقی حکومت نے وزیرآباد میں عمران خان پر فائرنگ کی تحقیقات کے معاملے میں جوائنٹ انویسٹی گیشن ٹیم (جے آئی ٹی) پر اعتراض اٹھادیا۔وزارت داخلہ نے جے آئی ٹی پر اعتراض سے متعلق مراسلہ محکمہ داخلہ پنجاب کو لکھ دیا۔
وزارت داخلہ نے اعتراض اٹھایا کہ جے آئی ٹی میں تمام ممبران پنجاب پولیس کے ہیں، اس میں کسی اور ایجنسی یا خفیہ ادارے کا نمائندہ نہیں ہے۔مراسلے میں مزید کہا گیا کہ وفاقی حکومت عمران خان پر حملے کی جے آئی ٹی میں آئی ایس آئی اور آئی بی کے نمائندے شامل کرنے کی تجویز دیتی ہے۔وزارت داخلہ کے مراسلے میں یہ بھی کہا گیا کہ اچھا ہوگا پنجاب حکومت جے آئی ٹی میں وفاقی ایجنسیز کے نمائندے بھی شامل کرے۔مراسلے میں کہا گیا کہ پنجاب حکومت نے جے آئی ٹی کا سربراہ سی سی پی او لاہور غلام محمود ڈوگر کو بنایا ہے، جنہیں اسٹیبلشمنٹ ڈویڑن پہلے ہی معطل کرچکا ہے۔وزارت داخلہ نے مراسلے میں کہا کہ غلام محمود ڈوگر کو عارضی طور پر فیڈرل سروس ٹربیونل سے ریلیف ملا ہے، ایسے ا?فیسر کو سربراہ مقرر کرنے سے شفاف تحقیقات ممکن نہیں۔
