لاہور (این این آئی) پاکستان تحریک انصاف کے چیئرمین و سابق وزیر اعظم عمران خان سے جماعت اسلامی پاکستان کے امیر سراج الحق نے ملاقات کر کے انکی عیادت کی۔سراج الحق کی قیادت میں جماعتِ اسلامی کا وفد عمران خان سے ملاقات کے لیے لاہور میں انکی رہائشگاہ زمان پارک پہنچا۔وفد میں لیاقت بلوچ، امیر العظیم اور قیصر شریف بھی شامل تھے۔
جماعت اسلامی کے رہنماؤں نے عمران خان کی خیریت دریافت کرنے کے ساتھ انکی جلد صحتیابی کی دعا بھی کی۔ ملاقات کے بعد سراج الحق نے میڈیا کرتے ہوئے کہا کہ ہم عمران خان کی عیادت کے لیے آئے تھے، چیئرمین پی ٹی آئی کی صحت یابی کے لیے دعا گو ہیں۔انہوں نے کہا کہ سیاستدان کہیں بھی بیٹھیں سیاست پر بات ضرور ہوتی ہے۔عمران خان نے ہمیں نہ ہی لانگ مارچ میں شرکت کی دعوت دی اور نہ ہم نے شرکت کی ہامی بھری۔سراج الحق نے کہا ہے کہ انتخابی اصلاحات پر جماعتِ اسلامی کا موقف واضح ہے کہ تمام سیاسی جماعتوں کو انتخابی اصلاحات پر بات کرنی چاہیے۔الیکشن سے پہلے انتخابی اصلاحات ضروری ہیں، انتخابی اصلاحات کے بغیر الیکشن پہلے ہی دن متنازعہ ہو جاتے ہیں۔انہوں نے کہا کہ جلسہ، جلوس، مارچ، سیاسی ہلچل اور سیاسی سرگرمیاں ہر سیاسی جماعت کا حق ہے۔میڈیا سے گفتگو کے دوران سراج الحق نے مطالبہ کیا ہے کہ ملک میں متناسب نمائندگی کا اصول اپنایا جائے۔واضح رہے کہ 3 نومبر کو لانگ مارچ کے دوران وزیر آباد میں قاتلانہ حملے میں سابق وزیرِ اعظم عمران خان فائرنگ سے زخمی ہوگئے تھے۔واقعے میں ایک شخص جاں بحق اور پی ٹی آئی چیئرمین عمران خان و دیگر رہنماوں سمیت 13 افراد زخمی ہوئے تھے۔فائرنگ کرنے والے شخص نوید کو بعد میں کنٹینر کے قریب سے پکڑ لیا گیا تھا جس نے عمران خان پر فائرنگ کا اعتراف بھی کیا تھا۔
