خور شید شاہ کے بھائی کو چیئرمین سکھر بورڈ کے عہدے سے ہٹا دیا گیا۔مجتبیٰ شاہ گزشتہ 12 برس سے چیئرمین سکھر تعلیمی بورڈ کے عہدے پر تعینات تھے۔

سکھر(این این آئی)پیپلز پارٹی کے سینئررہنمااور وفاقی وزیرسید خورشید احمد شاہ کے 70 سالہ بھائی سید مجتبیٰ شاہ کو چیئرمین سکھر تعلیمی بورڈ کے عہدے سے ہٹادیا گیا ہے۔سید مجتبیٰ شاہ گزشتہ 12 برس سے چیئرمین سکھر تعلیمی بورڈ کے عہدے پر تعینات تھے۔ محکمہ بورڈز و جامعات کے سیکرٹری مرید راہموں نے جمعرات کو بذریعہ نوٹیفکیشن انہیں بطور چیئرمین ڈی نوٹیفائی کردیا۔ سکھر بورڈ کے 19 گریڈ کے افسر رفیق احمد پلھ کو چیئرمین بورڈ کی اضافی ذمہ داریاں تفویض کردی گئی ہیں۔ یاد رہے کہ گزشتہ برس سندھ کے سکھر بورڈ سمیت سندھ کے 5 تعلیمی بورڈز میں تلاش کمیٹی نے چیئرمین کے امیدواروں کا انتخاب کرلیا تھا جن کی تین انٹلیجنس اداروں سے کلیئرنس بھی حاصل کرلی گئی تھی۔تاہم سیاسی دبائو کے باعث ان امیدواروں کو تقرر نامے جاری نہیں کئے گئے اور پھر بعد اس معاملے میں پٹیشن دائر کرکے اسٹے لے لیا گیا جسے محکمہ بورڈز و جامعات کئی ماہ گزرنے کے باوجود ختم نہیں کراسکا ہے۔