لاہور( این این آئی)پنجاب حکومت کی جانب سے صوبے کی عوام کو بجلی پر 3 ماہ کیلئے سبسڈی دینے کی تیاریاں شروع کردی گئی ہیں اور اس حوالے سے حکومت پنجاب کے احکامات پر محکمہ توانائی پنجاب نے پلان تیار کرلیا ہے ۔نجی ٹی وی کے مطابق لاہور سمیت پنجاب بھر
میں گھریلو صارفین کوبجلی کے بلوں میں سبسڈی کے لئے 15 ارب روپے بطور سبسڈی دئیے جائیں گے ،سبسڈی سے متوسط طبقے کے گھریلو صارفین فائدہ حاصل کرسکیں گے ۔ذرائع کا کہنا ہے کہ ایسے گھریلو صارفین جن کی بجلی کی کھپت 200 یونٹ تک ہے صرف انہیں سبسڈی ملے گی ۔محکمہ توانائی نے بجلی پر سبسڈی اور ٹیرف سے متعلق مختلف سلیب حکومت کو پیش کردئیے ہیں۔دوسری جانب پنجاب کے بجٹ میں بھی سرکاری ملازمین اور پنشنرز کیلئے وفاق کی طرز پراضافے کی تجویزدی گئی ہے۔محکمہ خزانہ کے حکام کے مطابق پنجاب حکومت بھی وفاق کے مطابق تنخواہوں اور پنشن میں اضافہ کرے گی، پنجاب حکومت کی جانب سے سرکاری ملازمین کی تنخواہوں میں 15فیصد اور پنشن میں 5 فیصد اضافے کی تجویز پیش کی گئی ہے، اس حوالے سے ورکنگ بھی مکمل کر لی گئی۔علاوہ ازیں پنجاب کابینہ میں توسیع کا دوسرا مرحلہ آج ( اتوار) کے روز مکمل ہونے کا امکان ہے،کابینہ میں20 ارکان کی شمولیت متوقع ہے ۔ذرائع کے مطابق رانا مشہود احمد، میاں مجتبیٰشجاع الرحمان، خواجہ عمران نذیر ، کرنل (ر)ایوب، یاور زمان، ملک تنویر اسلم، بلال یاسین ، سیف کھوکھر، ذکیہ شاہ نواز، منشا اللہ بٹ، جہانگیر خانزادہ ،کرنل (ر)طارق، عظمی بخاری، کاظم علی پیرزادہ، ملک ندیم کامران، طاہر خلیل سندھو اور چودھری اقبال گجر کا کابینہ میں شامل ہونے کا امکان ہے۔پیپلز پارٹی کے بھی مزید دو افراد کا کابینہ میں شامل ہونے کا امکان ہے، پیپلز پارٹی کو کابینہ میں مزید 3 وزراء اور 2 مشیر مل سکتے ہیں۔
