ممبئی (نیوز ڈیسک) بالی ووڈ کے نامور اداکار اور بھارتی فلم انڈسٹری کے بے تاج بادشاہ امیتابھ بچن کے بیٹے ابھیشک بچن کا کہنا ہے کہ اداکار کی زندگی بھی مشکلات سے بھری ہوتی ہے اور انہیں بہت سے چیلنجز سے نمٹنا پڑتا ہے۔ ابھیشک کاکہنا ہے کہ باکس آفس پر فلم کی ناکامی کی صورت میں انہیں سخت تنقید کا سامنا کرنا پڑتا ہے اور اس وقت لوگ ان کی کالز تک نہیں سنتے۔ لوگ یہ نہیں دیکھتے کہ آپ کون ہیں کس کے بیٹے ہیں ان کے سامنے بس آپ کی ناکام فلم موجود ہوتی ہے جس پر وہ بات بھی نہیں کرنا چاہتے۔ ان کا کہنا تھا کہ ایک اداکار کے لئے اس سے بڑھ کر کوئی بری خبرنہیں ہوتی ، جب اس معلوم ہوتا ہے کہ اس کی فلم ناکامی کی طرف جا رہی ہے۔ ابھیشک نے اداکاروں کے حق میں بات کرتے ہوئے کہا کہ کوئی بھی اداکار یہ نہیں چاہتا کہ جس فلم میں اس نے کام کیا ہو وہ ناکامی کی جانب جائے تاہم اس کے باوجود انہیں تنقید برداشت کرنا پڑتی ہے۔ انہوں نے اپنے متعلق پوچھے گئے ایک سوال کے جواب میں کہا کہ وہ فلموں کے انتخاب میں احتیاط سے کام لیتے ہیں کیونکہ یہ ایک نازک مرحلہ ہوتا ہے۔