اسلام آباد (این این آئی)پاکستان پیپلز پارٹی کے سیکرٹری اطلاعات فیصل کریم کنڈی نے عمران خان کو دنیا کا بدترین جھوٹا قرار دیتے ہوئے کہا ہے کہ وہ ہر روز نئی طوطا کہانی

گھڑ کر قوم کو گناہ کرنے کی کوشش کر رہے ہیں۔ اپنے بیان میں انہوں نے کہا کہ چار سال تک عوام کا خون نچوڑنے کے بعد عمران خان قوم سے قربانی مانگ رہے ہیں۔ انہوں نے کہا کہ لیڈر قوم پر اپنی جان قربان کرتا ہے قوم سے قربانی نہیں مانگتا۔ گڑھی خدابخش بھٹو کا قبرستان شہیدوں سے آباد تو ہوا مگر ملک پر آنچ آنے نہیں دی۔ فیصل کریم کنڈی نے کہا کہ عمران خان نے تبدیلی کے نام پر ووٹ مانگ کر ہر طرف تباہی مچائی۔ یہ کیسا لیڈر ہے جو اپنا محل تو ریگولرائز کرواتا ہے مگر غریبوں کی جھونپڑیاں مسمار کراتا ہے۔ فیصل کریم کنڈی نے کہا کہ عمران خان نے ملکی معیشت اور خارجہ امور تباہ کر دئیے ہیں۔ آج ملک کا خزانہ خالی ہے اور ملک عالمی سطح پر تباہی کا شکار ہے۔ انہوں نے ریاست مدینہ کی بات کرکے ملک کو جہنم بنا دیا۔