اسلام آباد (این این آئی)وزیراعظم شہباز شریف نے آئی ایم ایف پروگرام آن ٹریک رکھنے کی ہدایت کی ہے ،وزیراعظم نے ٹیکس اہداف پر تفصیلی بریفنگ مانگ لی ،وزیراعظم کو اگلے ہفتے اس حوالے سے بریفنگ دی جائیگی،

نئی حکومت میں بھی ٹیکس گزاروں کو انعامات دینے کی اسکیم جاری رہے گی،ٹیکس جمع کرنے کی موجودہ رفتار برقرار رکھی جائے گی۔ یہ بات میڈیا سے گفتگو کرتے ہوئے چیئرمین ایف بی آر ڈاکٹر محمد اشفاق احمد نے بتائی۔ انہوںنے کہاکہ وزیراعظم شہباز شریف نے آئی ایم ایف پروگرام آن ٹریک رکھنے کی ہدایت کی ہے،وزیراعظم نے سالانہ ٹیکس ہدف بھی پورا کرنے پر زور دیا ہے۔انہوںنے کہاکہ موجودہ مالی سال 6100 ارب روپے ٹیکس جمع کرنے کیلئے پر امید ہیں، ایمنسٹی اسکیم پر عمومی تحفظات سامنے آئے ہیں،وزیراعظم نے ٹیکس اہداف پر تفصیلی بریفنگ مانگ لی ہے،وزیراعظم کو اگلے ہفتے اس حوالے سے بریفنگ دی جائے گی۔ چیئر مین ایف بی آر نے کہاکہ آئی ایم ایف کے ساتھ ساتویں اقتصادی جائزہ مذاکرات کیلئے رابطے جاری ہیں، نئی حکومت میں بھی ٹیکس گزاروں کو انعامات دینے کی اسکیم جاری رہے گی۔ انہوںنے کہاکہ ٹیکس جمع کرنے کی موجودہ رفتار برقرار رکھی جائے گی، انہوں نے کہاکہ موجودہ مہینے میں بھی ٹیکس محصولات حوصلہ افزا ہیں۔