نوشہرہ (این این آئی)پاکستان تحریک انصاف کے رہنما اور وزیر دفاع پرویز خٹک نے دعویٰ کیا ہے کہ عدم اعتماد کی تحریک میں اپوزیشن کے15 سے زائد ممبر غائب ہونگے،
اپوزیشن جتنے چاہے جلسے جلوس،لانگ مارچ کرے ہمیں کوئی پرواہ نہیں، اپوزیشن کو عدم اعتماد پیش کرنے پر شرمندگی کے سوا کچھ حاصل نہیں ہوگا۔جلسے سے خطاب کرتے ہوئے پرویز خٹک نے دعویٰ کیا کہ انہوں نے تین چار دن میں اپوزیشن کے کئی ممبران اپنے ساتھ ملالیے ہیں، یہ ہم سے 10 ممبر لے گئے ہم نے ان کے 15 ممبر توڑ دئیے، اپوزیشن عدم اعتماد کی تحریک لائیگی تو ان کے اپنے 15 سے زائد ممبر غائب ہوں گے۔پرویز خٹک نے کہا کہ وزیر اعظم عمران خان کے خوف سے اپوزیشن اکھٹی ہوئی ہے، اپوزیشن کے پاس حکومت کے خلاف کوئی ایجنڈا نہیں، مولانا فضل الرحمان،آصف علی زرداری اور نواز شریف حکومت نہیں گراسکتے، صرف اللہ ہی عمران خان کی حکومت گرا سکتا ہے۔وزیر دفاع پرویز خٹک نے کہاکہ وزیر اعظم غریب عوام کے لیے مزید اعلانات کریں گے۔
