ممبئی(نیوز ڈیسک) بالی ووڈ اداکار عامر خان پر پولیس کی تضحیک کے الزام میں مقدمہ درج کر لیا گیا ہے۔ فلم میکر پی آر الہاس نے عامر خان کے خلاف ممبئی پولیس سٹیشن میں درخواست درج کرائی ہے جس میں موقف اختیار کیا گیا کہ بالی ووڈ سٹار نے اپنی فلم میں پولیس کے محکمے کی توہین کی۔ واضح رہے کہ اس فلم میں عامر خان نے پی کے کا کردار ادا کیا جو دوسرے سیارے کی مخلوق ہے۔ فلم میں پی کے کو پولیس اہلکار کو ٹلا کہتے دکھایا گیا، بھارت میں یہ لفظ عام طور پر احمق یا جاہل کے لئے بولا جاتا ہے۔ اس پر پولیس نے عامر خان کے خلاف مقدمہ درج کر لیا ہے۔ عامر خان کی فلم پی کے اگرچہ بلاک بسٹر ثابت ہوئی ہے لیکن اس پر تنقید بھی کی گئی۔ فلم میں ہندوو¿ں کے مذہبی رجحانات کو تنقید کا نشانہ بنایا گیا جس پر عامر خان کے خلاف کئی تھانوں میں درخواستیں دی گئی تھیں، انتہا پسند ہندوو¿ں نے عامر خان کے خلاف مظاہرے بھی کئے تھے۔