واشنگٹن(نیوزڈیسک )تصور کریں ایک ایسی ویڈیو کال کا جس کا آڈیو دیگر افراد سننے سے قاصر ہو۔یہی وہ ناقابل یقین اور منفرد فیچر ہے جو یاہو نے اپنی نئی میسجنگ ایپلی کیشن میں متعارف کرایا ہے۔معروف امریکی انٹرنیٹ فرم نے رواں ہفتے ایک نئی ایپلی کیشن لائیو ٹیکسٹ کے نام سے جاری کی ہے جس میں ویڈیو کالنگ کو ٹیکسٹنگ کی طرح پرائیویٹ بنانے کی کوشش کی گئی ہے۔یاہو کا کہنا ہے کہ ویڈیو کال تحریری پیغامات کے مقابلے میں جذبات کے اظہار کا زیادہ بہتر ذریعہ ہے مگر ویڈیو فیچر میں آڈیو اس نجی بات چیت کو پبلک بنادیتی ہے۔تاہم لائیوٹیکسٹ میں آپ اپنے دوستوں کو ٹائپ کرکے پیغام دیں گے جبکہ ویڈیوز آواز کے بغیر ہوںگی۔واٹس ایپ، فیس بک میسنجر اور اسکائپ سمیت دیگر اپلیکشنز میں ویڈیو کالز کی سہولت موجود ہے تاہم یاہو نے ویڈیو کو خاموش کرکے کچھ نیا پیش کرنے کی کوشش کی ہے۔یاہو کو توقع ہے وہ اپنی نئی میسجنگ ایپلی کیشن سے واٹس ایپ، اسنیپ چیٹ اور دیگر کو سخت ٹکر دے سکے گا۔یہ سروس آئی او ایس اور آنڈرائیڈ صارفین کے لیے پیش کردی گئی ہے۔تاہم ابھی اس بارے میں کچھ کہنا مشکل ہے کیونکہ اس کے صارفین کی تعداد دیگر ایپلی کیشن کے مقابلے میں کافی کم ہے