لاہور( این این آئی)پاکستان مسلم لیگ (ن)کی رکن پنجاب اسمبلی ثانیہ عاشق ہراساں کیے جانے اور دھمکیوں کے خلاف ایف آئی اے سائبر کرائم ونگ کودرخواست دے دی ہے۔ایف آئی اے سائبر کرائم ونگ میں دی گئی درخواست میں ثانیہ عاشق نے کہا ہے کہ ان کے خلاف سوشل میڈیا پر نامعلوم افراد نے مہم چلا رکھی ہے۔درخواست کے متن کے مطابق ثانیہ عاشق نے کہا کہ ٹک ٹاک پر میری ویڈیوز بنا کر وائرل کی گئیں، سوشل میڈیا اور ٹک ٹاک اکائونٹس بھی بنائے گئے ہیں
جن میں میری تصاویر استعمال کی جا رہی ہیں۔انہوںنے درخواست میں لکھا کہ میرے نام منسوب کر کے میرے خلاف نازیبا ویڈیوز وائرل کی گئیں۔ثانیہ عاشق نے مزید کہاکہ انہیںروزانہ مختلف نمبرز سے متعدد کالز اور میسیجز موصول ہو رہے ہیں۔ رکن اسمبلی نے ان کالز کا ریکارڈ اور سوشل میڈیا اکائونٹس کے اسکرین شاٹس بھی ایف آئی اے کو فراہم کر دئیے ہیں۔درخواست موصول ہونے کے بعدایف آئی اے نے شکایت کے مطابق اس پر کارروائی شروع کر دی ہے۔
