لاہور (آن لائن)وزیراعلیٰ پنجاب سردارعثمان بزدار نے کہا ہے کہ پاکستان تحریک انصاف جنوبی پنجاب کی محرومیوں کا ازالہ کرنے کیلئے پرعزم ہے۔پنجاب کابینہ نے جنوبی پنجاب سیکرٹریٹ کی خودمختاری کیلئے تاریخ ساز فیصلہ کیا ہے ۔جنوبی پنجاب سیکرٹریٹ کیلئے

پنجاب گورنمنٹ رولز آف بزنس میں ترمیم کی منظوری دی ہے ۔انہوںنے کہا کہ ایڈیشنل چیف سیکرٹری، سیکرٹریز اور محکموں کے اختیارات کو واضح کر دیا گیاہے۔ سائوتھ پنجاب سیکرٹریٹ 3 ڈویژن اور 11 اضلاع پر مشتمل ہوگا۔ جنوبی پنجاب سیکرٹریٹ میں سرکاری محکموں کی تعداد 17 ہوگی۔انہوںنے کہا کہ جنوبی پنجاب کے ایڈیشنل چیف سیکرٹری اور سیکرٹریز کو انتظامی طور پر مکمل بااختیاربنایا گیاہے۔ پاکستان تحریک انصاف کی حکومت نے جنوبی پنجاب کے عوام سے کئے وعدہ کی پاسداری کرتے ہوئے عملی قدم اٹھایا ہے۔ پنجاب کی تاریخ میں پہلی دفعہ سائوتھ پنجاب کیلئے الگ اے ڈی پی بک کا اجراء کیا گیا ہے۔ جنوبی پنجاب کے لئے 33 فیصد بجٹ مختص کیا ہے جو کہ 190 ارب روپے بنتا ہے – جنوبی پنجاب کے بجٹ کی رنگ فینسنگ کی ہے اور اب اس بجٹ کو کسی اور مقصد کے لئے استعمال نہیں کیا جا سکتا – انہوںنے کہا کہ جنوبی پنجاب کے لئے سروس ٹربیونل کے قیام کی بھی منظوری دے دی گئی ہے -بہاولپور میںبھی جنوبی پنجاب سیکرٹریٹ قائم کیا جائے گا،جلدسنگ بنیاد رکھیں گے -انہوںنے کہا کہ پنجاب حکومت نے جنوبی پنجاب کے عوام سے کیا وعدہ پورا کیا ہے ۔ اس تاریخی اقدام سے جنوبی پنجاب کے عوام کے مسائل مقامی سطح پر حل ہوں گے۔