لاہور( این این آئی )پاکستان کرکٹ ٹیم کے ہیڈ کوچ مصباح الحق کا کورونا ٹیسٹ مثبت آگیا ہے ، مصباح الحق جمیکا میں دس روز قرنطینہ کرنے کی وجہ سے قومی اسکواڈ کے دیگر ارکان کے ہمراہ لاہور واپس نہیں آسکیں گے ۔دس روز تک جمیکا میں قرنطینہ کے بعد انہیں پاکستان واپسی کی اجازت ہوگی۔کیریبین میں موجود قومی اسکواڈ میں شامل تمام ارکان کی وطن واپسی سے قبل دو مرتبہ کوویڈ 19 ٹیسٹنگ کی گئی اورٹیسٹنگ کے نتائج میں صرف مصباح الحق ہی وہ واحد رکن تھے جن کے دونوں کورونا ٹیسٹ کی رپورٹ مثبت آئی ۔ ٹیسٹ مثبت ہونے کے باوجود مصباح الحق میں کورونا کی کوئی علامت ظاہر نہیں ہوئیں۔ پی سی بی ویسٹ انڈیز کرکٹ بورڈ کے ساتھ مسلسل رابطے میں ہے۔ میزبان بورڈ نے تصدیق کی ہے کہ مصباح الحق کو دس روزہ قرنطینہ کے لیے جلد دوسرے ہوٹل منتقل کردیا جائے گا، جہاں میڈیکل اسپیشلسٹ ان کی دیکھ بھال کرنے کے لیے موجود ہوں گے۔