ماسکو(مانیٹرنگ،این این آئی) لاپتہ ہو جانے والا روسی طیارہ مل گیا، پائلٹ کی حاضر دماغی کام کر گئی۔ طیارے کا اچانک کنٹرول روم سے رابطہ منقطع ہو گیا تھا، جہاز کے ریڈار سے غائب ہونے یا کنٹرول روم سے رابطہ ختم ہونے کا مطلب حادثہ ہی لیا جاتا ہے، پائلٹ نے حاضر دماغی
کا مظاہرہ کیا اور بہت مشکل سے ہنگامی لینڈنگ کی اور طیارے کو ائیرپورٹ پر اتار لیا، مسافروں کو معمولی چوٹیں آئی ہیں، تمام مسافر معجزانہ طور پر محفوظ رہے۔ 17 مسافروں کو لے کر جانے والا روسی طیارہ انتونوف-28 پرواز بھرنے کے بعد سائیبیریا کے علاقے میں لاپتہ ہوگیا۔عالمی میڈیا کے مطابق روس میں علاقائی نجی فضائی کمپنی کے مسافر بردار طیارے انتونوف-28 کی ڈومیسٹک فلائٹ کا رابطہ پرواز بھرنے کے کچھ ہی دیر بعد ٹومسک کے مقام پر رابطہ کنٹرول ٹاور سے منقطع ہوگیا تھا۔فضائی کمپنی کے ترجمان کا کہنا ہے کہ ماسکو سے ٹومسک جانے والا طیارہ سائیبیریا کے علاقے میں پرواز کے دوران اچانک لاپتہ ہوگیا۔ طیارے میں عملے کے 3 ارکان اور 14 مسافر موجود تھے۔ طیارے کی تلاشی کے لیے ریسکیو آپریشن شروع کردیا گیا۔فیڈرل ایوی ایشن کا کہنا ہے کہ دو ریسکیو ہیلی کاپٹرز کو طیارے کی تلاش کے لیے سائیبیریا کے علاقے میں بھیج دیا گیا ہے۔ جس وقت طیارہ لاپتہ ہوا سائیبیریا ریجن کا موسم خراب تھا اور زیادہ تر حادثات کی وجہ بھی موسم کی خرابی تھی۔واضح رہے کہ دو ہفتے قبل روس میں ہی ایک مسافر بردار طیارہ گر کر تباہ ہوگیا تھا جس کے نتیجے میں 28 افراد ہلاک ہوگئے تھے۔
