راولپنڈی(آن لائن)پبلک ٹرانسپورٹ نے سیکرٹری ٹرانسپورٹ سے ملی بھگت کر کے کرایہ ناموں میں ازخود اضافہ کر کے روات سے جوڑیاں تک 37کلومیٹر کا کرایہ ایک سو روپے مقر ر کرتے ہوئے عوام کی چیخیں نکلوا دیں،ٹریفک پولیس کو شکایت کرنے کے باوجود

بھی ٹس سے مس نہ ہوئے ، عوام کا کہناہے کہ سیکرٹری ٹرانسپورٹ نے نوٹس نہ لیا تو روات سے لیکر چک بیلی خان تک پبلک ٹرانسپورٹ بند کرنے کے لیے عام شہری جی ٹی روڈ پر نکل آئیں گے ،معلوما ت کے مطابق گزشتہ تین دن سے روات سے جوڑیاں اور چک بیلی خان تک چلنے والی پبلک ٹرانسپورٹ نے ازخود کرایہ میں اضافہ کر دیا ہے اور30سے 35کلومیٹر تک کا کرایہ ایک سو روپے مقرر کر دیا ہے ،ٹرانسپورٹر کے اس ظالمانہ اقدام کے خلاف گزشتہ روز روات اڈا پر ٹریفک پولیس کو شکایت کی گئی لیکن کوئی شنوائی نہ ہو سکی ہے ،تاہم اس حوالہ سے ذرائع کا کہنا ہے کہ سیکرٹری ٹرانسپورٹ نے پبلک ٹرانسپورٹ کو کرایہ بڑھانے کا گرین سگنل دیا تھا جس پر انہوںنے ظالمانہ کرایہ نافذ کر دیا ہے۔واضح رہے سواں اڈہ تا چک بیلی خان کا کرایہ بھی 100روپے کردیا گیا ہے ۔ گزشتہ روز روات اڈا پر عام شہریوں نے احتجاج کرتے ہوئے مطالبہ کیاکہ جعلی کرایہ واپس نہ لیا گیاتو وہ جی ٹی روڈ کو بلاک کر کے پبلک ٹرانسپورٹ بندکردیں گے ۔ظفر ملک#/s#