اسلام آباد ( آن لائن ) وزیراعظم عمران خان نے کہا ہے کہ امریکا اور مغربی طاقتوں کا پاکستان کو جانب دارہونے پر مجبور کرنا درست نہیں، کچھ بھی ہو جائے کتنا بھی دبائو ہو پاک چین تعلقات تبدیل نہیں ہو سکتے ۔چینی ٹی وی کو انٹرویو دیتے ہوئے وزیراعظم عمران خان نے کہا کہ پاکستان کے چین کے ساتھ ہمیشہ سے خاص تعلقات رہے ہیں، چین نے ہر مشکل گھڑی میں پاکستان کا ساتھ دیا۔
خطے میں بڑی طاقتوں کے درمیان ایک عجیب سے کشمکش جاری ہے، امریکا چین کو لے کرتشویش میں ہے، امریکا نے چین کے خلاف علاقائی اتحاد قائم کیا ہے امریکا نے بھارت اور دو مزید ممالک کے ساتھ مل کر خطے میں ایک اتحاد بنایا ہے، امریکا اور مغربی طاقتوں کا پاکستان کو جانب دارہونے پر مجبور کرنا درست نہیں ہمیں جانب دار ہونے کی ضرورت نہیں، سب کے ساتھ اچھے تعلقات ہونے چاہئیں، کسی بھی دباؤ کی صورت میں چین سے پاکستان کے تعلقات متاثر نہیں ہوں گے ۔انہوں نے کہا کہ امریکہ اور چین میں مخاصمت بڑھ رہی ہے جبکہ امریکہ اور یورپی ملک چاہتے ہیں کہ ہم کسی ایک گروپ کا ساتھ دیں ہمیں کسی کے گروپ میں جانے کی ضرورت نہیں بلکہ ہم سب کے ساتھ تعلق رکھنا چاہتے ہیں۔ انہوں نے کہا کہ ہم چین کے ساتھ تجارت بڑھانا چاہتے ہیں سی پیک پاکستان کے لئے بہت بڑامنصوبہ ہے سی پیک پاکستان کے معاشی مستقبل کے لیے اہم ہے۔ ایک سوال کے جواب میں انہوںنے کہا کہ پا کستانیوں کے دل میں چینی عوام کی بڑی عزت ہے پاک چین تعلقات صرف حکومتی سطح پر نہیں عوامی سطح پر بھی ہے تجارت و سیاسی تعلقات سے چین کے ساتھ مزید مضبوط رشتہ قائم کرینگے عالمی معاملات میں پاک چین ساتھ کھڑے ہیں اور کھڑے رہیں گے مشکل وقت میں ساتھ دینے والے یاد رہتے ہیں چین کے ساتھ تعلقات مضبوط سے مضبوط تر ہو رہے ہیں ۔
