نیویارک(این این آئی )ایک نئی تحقیق میں انکشاف کیا گیا ہے کہ کورونا وائرس 20 ہزار سال قبل بھی وار کرچکا ہے۔میڈیارپورٹس کے مطابق ایسے ثبوت ملنے کا دعوی کیا گیا ہے جن کے مطابق کورونا وائرس مشرقی ایشیا میں تباہی پھیلا چکا ہے۔ماہرینِ حیاتیات کہتے ہیں کہ

وبا نے کئی سالوں تک خطے کو جکڑ کر رکھا تھا اور کورونا وائرس نے لوگوں کے ڈی این اے میں ارتقائی نقوش چھوڑے ہیں۔ایری زونا یورنیورسٹی کے ماہرین کی تحقیق کے مطابق اس دوران کورونا انفیکشن کے خلاف مدافعت پیدا کرنے والے جین بھی تیزی سے پھیلے، وہ جین آج کے وبائی مرض کے لیے نہایت اہم ثابت ہو سکتے ہیں۔ڈاکٹر اینارڈ کا کہنا تھا کہ ویکسین سے کووڈ 19 پر قابو نہیں پایا گیا تو اس کے اثرات تباہ کن ہو سکتے ہیں، آج جو کچھ ہو رہا ہے وہ ہماری نسلوں تک جاری رہ سکتا ہے۔ان کا مزید کہنا تھا کہ گزشتہ 20 سال کے دوران 3 کورونا وائرس انسانوں میں پھیل چکے ہیں، ان میں کووڈ 19، سارس اور میرس شامل ہیں۔ڈاکٹر اینارڈ نے یہ بھی بتایا کہ یہ تمام وائرس چمگادڑوں یا دیگر جنگلی جانوروں سے انسانوں میں منتقل ہوئے، دیگر 4 قسم کے کورونا وائرس بھی پھیلے جن کے اثرات نسبتا کم تھے۔