اسلام آباد(مانیٹرنگ ڈیسک)سابق وزیر اعظم اور مسلم لیگ ن کے قائد نواز شریف نے تقریر کے دوران چائے دینے والے کو ڈانٹ پلا دی،میڈیا رپوڑٹس کے مطابق مسلم لیگ ن کے قائد نواز شریف نے لندن سے ویڈیو لنک کے ذریعے لاہور میں ورکرز کنونشن سے خطاب کیا۔
وہ ابھی تقریر کررہے تھے کہ اس دوران چائے دینے والے کو ڈانٹ دیا کہ چائے دینے سے پہلے مجھے پوچھ تو لینا تھا، ایسے ہی یہاں لاکر رکھ دی، جب تمہیں پتہ ہے کہ میں تقریر کررہا ہوں تو کیوں چائے یہاں رکھی؟ تاہم نوازشریف نے چائے کی ایک چسکی بھی بھری۔کچھ ٹی وی چینل نے ملازم کو بن دیکھے خبر دی کہ نوازشریف ملازم پر بھڑک اٹھے۔تاہم ویڈیو میں نوازشریف کو دیکھا جاسکتا ہے کہ وہ کس طرح چائے دینے والے کو سمجھا رہے ہیں۔دریں اثنا ویڈیو لنک کے ذریعے خطاب کرتے ہوئے انہوں نے کہا کہ اس میں کوئی شک نہیں کہ سوشل میڈیا ورکرز نے میرا ،مسلم لیگ (ن) اور مریم نواز کا مان رکھا ،آپ ہماری تحریک میں فرنٹ لائن پر ہیں،جی چاہتا ہے کہ میں آپ کو گلے کے ساتھ لگائوں ، آپ کا جوش و خروش اورولولہ پاکستان کے روشن مستقبل کی نوید سنا رہا ہے اور آج میں فخر سے کہہ سکتا ہوں کہ مسلم لیگ (ن) کے سوشل میڈیا کا کسی دوسری جماعت سے کوئی مقابلہ نہیں اور ہماری ٹیم کا کوئی ثانی نہیں ہے ،
وہ دن گئے جب سوشل میڈیا کسی اور جماعت کا قلعہ تھا ، مریم نواز اس پر مبارکباد کی مستحق ہیں جنہوں نے انتھک محنت سے اس کی داغ بیل ڈالی اور آپ نوجوانوں کو ملکی سیاست میں متحرک کرنے میں اہم کردار ادا کیا ۔یاد رہے کہ سابق وزیر اعظم نے رواں سال ہی ٹوئٹر کو جوائن کیا تھا اور اسکے ذریعے ہی وہ پاکستان میں ہونے والے سیاسی جلسوں سے بذریعہ ویڈیو خطاب کرتے ہیں ۔
